阿叻認口臭：都係王晶教

陳百祥（阿叻）與好友王晶早前因港姐「開戰」，兩人昨日錄影港姐節目選出九強佳麗。叻哥當眾向王晶道歉，王晶即自認有白內障，場面惹笑。

節目開始時，阿叻先向王晶鞠躬道歉：「好榮幸請到我恩師王晶，係佢一手捧紅我，但點解我哋啲眼光咁唔同？我鄭重向你道歉，口不擇言講錯嘢，但都係你教嘅。」曾被阿叻嘲患白內障的王晶抵死回敬：「我睇咗醫生，話我有啲白內障，依家醫好咗，等我戴番副眼鏡睇清楚啲。」還指最初認為佳麗質素麻麻，但已逐漸變好。

陳華鑫再三被叮

事後，阿叻再冧王晶：「佢（王晶）係我恩師，多謝佢捧紅我！我死剩把口，稱呼人少得罪人多，全靠佢指導我。」王晶則指大家都是自己人，阿叻即說：「睇吓人哋心胸幾廣闊！朋友係攞嚟墊底，敵人先攞嚟攻擊！」

港姐方面，繼張名雅、曾明俐及李渼琦率先入圍後，大會昨日公布第四至九位入圍名單，包括陳潔玲、岑杏賢、朱千雪、黃心穎、林泳淘與湯鎮業姪女湯洛雯，順利晉級決賽。而盛傳「復活」的鍾麗及陳華鑫最終三度被叮出局，陳華鑫坦言有點失落，而鍾麗則不覺被玩：「分數係交畀律師樓，佢哋自有準則，冇話公唔公平，但實有唔開心。」湯洛雯就無懼被指內定。落選的陳華鑫於Fansbook上載楚楚可憐樣「道別」，及後與同樣未能入選九強的王舒銳、尤蔭蔭及卞曉帆共進晚餐，姊妹情深！