克勤：周圍去都得

李克勤前晚出席《EURO 2012慶功宴》，曾為無綫擔任足球評述的他，大讚now自由度大：「我呢個身份周圍去都OK！」

早前於now台為「歐國盃」講波的李克勤，前晚與黃日華、梁榮忠及何麗全等出席Now Sports《EURO 2012慶功宴》，克勤笑言任務完成：「由年頭開始，晚晚睇波同做直播，學到好多嘢，比起以前喺TVB，今次評述多咗。」他坦言這次廣告收入與收視都很理想。問到會再做評述節目？他說：「喺呢個台講第個台唔太好，但我收咗啲溫馨嘅電話。（已落實？）過咗今晚先講啦！依家仲度緊期，以我依家個身份周圍去都OK，大家都明個環境。」克勤透露前晚從上海返港，出席內地大型歌唱比賽《聲動亞洲》，與張宇及譚詠麟任評判，並謂當地製作水平高，令他眼界大開。

華哥撐有線奧運

至於黃日華指奧運將於三台播放，所有人均可收看，並指三台都贏，一天都光晒！問到會收看哪個台？他說：「睇全程梗係有線啦！ATV同TVB都只係播200個鐘。（鍾意睇咩？）乜都鍾意，國家隊就梗係睇排球、乒乓球、足球同跳水啦！睇奧運仲可以睇到運動員拚搏同永不言敗嘅精神，學習做人道理。」他又稱想看劉翔跨欄比賽，望大家為他打氣。