吳卓羲賜「予」名分：愛咪得囉！

無綫小生吳卓羲（Ron）與內地性感女星張馨予的戀情一直只是半公開，但予予不時在微博施壓希望坐正「羲嫂」之位！日前終成功迫使Ron默認幸福，昨日Ron更主動開名認定女友及發表骨痹宣言：「大家愛大家咪得囉！」以行動冧爆在北京病倒的女友，予予苦等兩年終於得逞！

內地35F乳神張馨予向來好勝心強，自前年與吳卓羲（Ron）合作內地劇《大丫鬟》撻着後，經常在微博施苦肉計發牢騷，又曾「錯用」Ron的微博上載床照「洩蜜」，試圖逼男友公開名分，早前更表示「愛上壞男人」暗示已分手，令Ron非常頭痕！近日Ron開始讓戀情浮面，上周在微博中默認幸福，但仍未肯開名認女友！

未能得逞的予予繼續向男友施壓，加上前日她在北京拍電視劇《裸愛》時不支中暑病倒，要入院打點滴，終令Ron心軟！昨日Ron一反常態高調給予女友名分，更發表肉麻宣言，看來「不羈的羲」終於認定女友！難怪予予日前又在微博發功：「為簡單美好的幸褔，加油！」預祝坐正「羲嫂」之位！

感情穩定 四圍浪漫

昨日Ron出席活動時表示剛為新劇《戀愛季節》拍通宵戲，下月又開拍《衝上雲霄2》，工作密密麻麻，問到會否被女友詐型？他即笑問是誰，當聽到是「予予」時，他竟主動開名及發表骨痹宣言：「張馨予吖嘛！佢明白o架喇！依家都Keep住，總之大家愛大家咪得囉！」令全場呆晒！他再說：「係呀！冇聽錯呀！」提到《衝2》劇會到英國及法國取景，問到會否帶女友同行感受浪漫？他說：「邊度都可以浪漫！做嘢呀！唔好跟住嚟！（向女友派定心丸？）係唔想外間再有揣測。（感情穩定？）穩定！希望講完以後就專注工作。」他又表示《衝2》角色承接上集，但已是一名機長，並繼續與吳鎮宇演兄弟，問到是否已跟鎮宇見面？他說：「之前試造型就唔同日子，但都有食飯撞過佢。」記者致電張馨予經理人，惟至截稿前仍未回覆。

同場的呂慧儀對於Ron確認女友身份，她強調「聽唔到」：「如果係真嘅，梗係祝福佢！開心就得！」問到身形看似纖瘦不少，原來她經常打排球，希望趁夏天和老公去旅行曬太陽！