唐貝詩掘第一桶金年賺百萬

最近搞網上生意的唐貝詩，開業不夠半年已賺了6位數字，成績理想，她揚言要一年賺夠100萬元！工作代價是無暇識男仔，難怪她笑言要男士主動追求！

寇鴻萍的寶貝女唐貝詩（Lydia）去年畢業後，早前投身商界開設網上購物站，雖然創業短短半年，收入已經超過6位數字，為她打下強心針：「真係好開心！依家收入Double上，而且已經有兩萬個會員，生意算唔錯！」她亦定下年賺100萬元的目標，希望可以盡快搵到第一桶金︰「雖然之前使咗6位數字去搞網站，不過依家已經回到本，所以我好有信心，仲定咗1年賺100萬元嘅目標！」

畢竟是自己生意，Lydia凡事親力親為，她坦言現在忙到冇時停，但非常享受忙碌生活，並揚言要做女強人：「依家係好忙，不過我覺得好好玩！其實都係朝七晚七，時間可以分配得好好，放工都可以同人飲嘢，順便傾生意！」

呼籲男生主動啲

最近工作忙到不可開交，Lydia未有時間拍拖，提到感情狀況，她笑說︰「歡迎男仔追我！我太忙，冇時間去識男仔！我冇諗過鍾意咩類型嘅男仔，最緊要係夾唔夾，識咗男仔都要睇吓媽咪鍾唔鍾意先！（家人催你？）媽咪間唔中都有問我，不過唔急嘅，因為佢冇話要介紹男仔畀我識！」