娜姐斥教壞細路打落水狗Mia

「模媽」陳靜儀（Mia）早前被指姣溝師姐周秀娜男友陳偉成，二人早已種下牙齒印，眼見Mia寫真禁足書展，娜姐化身「淫審判官」幸災樂禍，狠批為人母的師妹寫真意淫教壞細路，有仇報仇！

陳靜儀（Mia）年初與師姐周秀娜男友陳偉成（Avis）合作電影《喜愛夜蒲2》，二人不乏床戲演出，Mia更無視師姐呷醋為Avis慶牛一，有傳因而令娜姐眼火爆，要男友禁慾1個月！兩師姐妹自此面左左，適逢Mia的寫真被淫褻物品審裁處評定為第II類物品（不雅物品），要「包膠」兼禁止在書展擺放發售，娜姐乘機踩多腳，「淫審判官」上身狠批一眾後輩寫真，同門師妹都冇情講！

Mia搞誓師大會

娜姐依次排列出今年「十大鹽書」，頭三位為黃榕、許穎（Phoebe）及Mia，當中點評情敵Mia時當堂「字字珠璣」，她說：「生咗兩個都Keep得咁好，算係咁喇！出寫真要睇用乜嘢意識出發，千祈唔好太過火！」她又踩作為一子一女之母的Mia沒有以身作則做好榜樣：「如果我生咗兩個細路，就唔會影啲咁嘅相，費事教壞細路！」

另一邊廂，得知被禁踏足書展後的Mia心情低落，昨日頹爆接受訪問，死撐寫真並不過火：「其實我同其他人都差唔多，唔明點解過唔到！」早前向公司借了6位數字的她一臉徬徨，提到家人時更雙眼通紅：「諗住靠呢次寫真還錢畀公司，我都仲未敢同家人講！我都只係想用自己嘅勞力養家！」她決定下周於書展場外搞誓師大會呼冤！

黃榕：我冇咁意淫

至於剝到盡的黃榕則認為自己的寫真應該會過到審查：「我嗰本冇Mia嗰本咁意淫，我又冇摸自己個胸、揭自己啲衫！」另一邊廂，另一胸模Phoebe仍未知審查結果。