高海寧梁烈唯啜到冇氣抖
無綫咪神高海寧昨日與梁烈唯為《法網狙擊》拍咀戲，要主動撲向唯唯擁吻，事後直言尷尬：「頭先Hold住好耐，抖唔到氣！綵排嗰陣已經忍唔住笑，因為入行識到依家，佢同我講『我愛你』就想笑！」兩人帶定薄荷糖做準備，但竟留在車上，最後惟有頂硬上。
唯唯有幸與咪神拍咀戲，自爆最近艷福不淺：「呢排我係咁咀，開工唔係錫JJ（賈曉晨）就錫胡定欣，今日連高Ling（高海寧）都錫埋！（邊個最好咀？）高Ling個嘴唇厚啲，好軟熟！JJ就比較濕，因為嗰場咀得激烈好多，而定欣只係錫額頭，佢唔肯畀我錫佢個嘴！」
