Fiona短打誘惑 神秘三角耀紅館

薛凱琪（Fiona）前晚舉行處女紅館騷，大唱偶像張國榮及王菲的金曲，並在Encore環節以Tube Dress上陣大騷香肩，更露出銀色三角褲狂扭，賣大包益粉絲！

薛凱琪前晚為兩場紅館個唱揭開序幕，全晚共換了五套戰衣，大部分都是短打Sell筷子腳，最有睇頭是Encore環節的Tube Dress配激短芭蕾舞裙。接近尾聲時，Fiona在全場歡呼下，在台中間出場，High爆的她在台上撳胸兼踎低演唱，由於芭蕾舞裙太短，不時露出型爆銀色小三角褲，唱到興起時更踢腳扭籮大玩「股惑」，相當誘人！

難忘走音往事

Fiona翻唱了不少高難度金曲，包括張國榮的《追》、王菲的《Miss you night and day》，她說：「無論大小嘅音樂會，我都一定會揀哥哥嘅歌唱，因為佢係我偶像！」還自爆剛出道演唱時不慎走音：「我第一次公開演唱，公司竟然安排我喺孫燕姿音樂會做嘉賓，當時我對住3,000人緊張到走音！」唱到《給十年後的我》時，Fiona更變大喊包並哽咽說：「呢首歌寫中咗我生命中最驚嘅嘢！不過我依家唔再驚，因為我好快樂！」

阿澤校炮狂拍

Fiona邀得兩位緋聞男友房祖名及方大同擔任嘉賓，除了在台上拖手送抱外，還眼濕濕地在鳴謝環節公開多謝兩人，而方大同更毫不避嫌在微博上載與Fiona、房祖名的後台合照，並寫道：「今晚再來！」令這段「三角錯」更迷離曖昧。至於好友杜汶澤亦有捧場，他變身龍友，以「大炮」長鏡拍下Fiona美麗的每一刻。