諸葛紫岐愛你不理

今年正式進入人生新階段的名模諸葛紫岐，與Neway太子爺薛嘉麟（主席）人前人後都是出名甜蜜兼冤氣。笑言在主席眼中是好老婆的諸葛，卻自評只是88分的妻子：「哈！我好謙虛，嗰12分係提醒自己仲有進步空間，至於主席真係值99分！」

還以為人稱公主的諸葛，定會有獨特的御夫術令主席馴服如羊，但她信奉「無為而治」，根本不用刻意做甚麼：「我好信緣分，我係為愛而拍拖，唔係為係咪靚仔或有錢而拍拖，既然做得夫婦，我哋係有緣同夾先至可以一齊。如果刻意逼佢做某啲嘢，我反而會懷疑佢係愛我定怕我！」

嗌交唔「隔夜」

婚前婚後，確不同。諸葛說有了家後，一切變得更踏實：「以前覺得婚書只係一張紙，但結婚後，我哋覺得原來唔係一張紙咁簡單，有個家真係好唔同。好似主席咁，結婚後好自然仲投放多啲時間喺工作上，因為佢覺得有我呢個好老婆喺背後打理頭家，佢可以好專心全力工作。」她承認兩人婚後的確少了點情趣：「我好明白，主席要花好多時間喺工作上。但識我嘅人都知我較踏實，唔係話要收花、收氣球、要人氹，花會謝，氣球都會冇氣啦！只要主席緊張我、關心我，已經好夠。好似每星期六、日，一定係Family Day，點忙都好，大家都要抽時間一齊。」

吹水，是諸葛及主席維繫感情之金科玉律：「我唔係嬌滴滴嘅女仔，成日要人氹，有咩都會攞出嚟講。如果主席見到我唔開心，就會好有耐性問我點解，仲會扮吓鬼臉或者扮跌親嚟氹吓我。總之點有拗撬都好，都唔會嬲到第日。」她續說：「好多人成日話要互相遷就，反而我認為互相尊重先啱。我當主席係Friend，無論邊個有問題都好，大家拎出嚟討論、講道理，起碼你要畀雙方知道大家諗緊咩，知道底線係咩。唔好夾硬遷就，我都唔想主席冇咗自己而夾硬聽我話，做應聲蟲係冇用！」

拒婚前協議

婚後的諸葛，仍現身Ball場及履行名模一職，她稱其實知道主席想她全職在家：「主席成日都同我講，叫我唔好做嘢。但一個女人要多啲見識、多啲接觸呢個世界，對雙方溝通都有好處。大家講吓自己見到或遇到嘅趣事，都係保持感情新鮮嘅一個秘訣。」

堪稱筍盤的主席，有才又有俊，必有飛來蜢，諸葛卻不以為然，一副淡定：「我只可以信佢，如果成日Check住佢，大家都唔開心、唔舒服啦！點解唔選擇信佢？同佢相處咁耐，我好清楚佢係點。但如果真係有呢一日，我好決絕㗎，Say Goodbye啦，唔好浪費時間！」

現今不少名人夫婦流行簽婚前協議，但諸葛認為這是對婚姻不敬，更稱財政大權全交由主席掌管：「主席理財方面當然醒過我好多，所以佢負責所有錢點使，我好信得過佢，所以我啲錢都叫佢幫我管埋。至於人人都話女人要有私己錢，我冇諗過呢樣嘢，因為除咗主席賺錢養我，我屋企人一直都有資助我！哈哈！」

後記：互望甜到漏

要說，主席和諸葛的確是令人眼冤的一對。他們真的是那些互相只輕輕對望就可以甜到漏那種。記得，有次諸葛駕車走錯路，日理萬機的主席雖口說叫大家不用擔心，但不時凝望手機似在等諸葛打來求救。當看見駕車走遍港九新界的諸葛現身，頓時見主席鬆一口氣。