陳倩揚「食」住老公

靚太「吾」易做！新一代人妻，要靚要有見識又要識做。身為薛家新抱的名模諸葛紫岐，向來奉行「無為而治」為相處之道，「唔當老公係老公」才是保持感情新鮮的真諦。前港姐、靚太兼靚媽陳倩揚，其御夫術夠實際，控制老公的口腹之欲，身心健康又愉快！

前港姐亞軍陳倩揚當選後零緋聞、少是非，原因是當時她已有拍拖多年的男友，兩人感情要好，並於前年拉埋天窗。倩揚去年還一索得男，囝囝陳羲廷現已13個月大，精靈可愛，一家三口樂融融！

湊仔添拗撬

身兼靚太與靚媽的倩揚，談到夫妻相處之道，她笑言有時要當枕邊人做「大BB」，控制對方的飲食習慣：「女仔本身有母愛，拍拖或結婚就會發揮出嚟，結婚後使命感大咗，老公係Life Partner（生命伴侶）。我好着重家人健康，要少鹽少油少糖，變成高纖、多菜少肉。我老公以前喺美國食好多快餐，依家幫佢清除體內『垃圾』，建立健康生活，起初都需要時間，佢都少食菜，但只要畀啲耐性同愛心，喺菜式方面下工夫就變成習慣。（以健康美食作為御夫術？）要餵飽佢個胃，我大前提係食得健康。」

結婚接近兩年，問到兩公婆有否試過「耍花槍」嗌交？倩揚說：「冇就一定呃人，以前兩個人拍拖，習慣咗雙方生活模式，嗰時識得包容同體諒；但自從多咗個小生命之後，我就着緊好多，始終BB喺我個肚出嚟，令我要求高咗，做嘢又要求快靚正，我哋湊仔唔假手於人，我先生係稱職老公同爹哋，但佢有時幫囝囝着褲或者包尿片手勢未夠好，我將唔高興情緒流露出嚟，會黑面同發脾氣！我哋兩公婆閂埋門就唔會有保留，好彩大家係冷靜嘅人，好快就冇事。（買禮物互氹？）咁又冇乜，因為大家都講道理，依家我哋寧願將啲錢儲起，將來作旅行之用。」

有錢一齊使

談到與老公是否財政獨立？她說：「我哋係『中央管理』，啲錢都係一家人用嘅，我老公係住家男人，一分一毫都用喺屋企，我哋幫囝囝開咗戶口，將利是錢同零用錢儲起佢，將來畀佢用。（婚前協議？）冇喎！結婚就係一生一世，應該要堅持同維繫，唔會有協議。」

貴為港姐亞軍，倩揚笑言過往甚少發生艷遇：「我同老公由拍拖到結婚都冇乜艷遇，嗰時我做空姐亦冇人追我，好似額頭鑿住『我有男友』四個字，我老公係『宅佬』，放工就返屋企，我哋好信任對方。」

後記： 有子萬事足

今年倩揚會於書展推出一本與育嬰有關的天書，對於不少模在書展爆寫真大戰，她完全不擔心遭「胸」襲。她表示新書講述由她懷孕到生仔，至現時囝囝滿一歲的心路歷程。講起兒子羲廷即眉飛色舞的她，指囝囝相當黐身，並開始進食「大人」食物：「佢食意粉、西蘭花同番茄等，好鬼擦得！」