精乖鍾懿氹胡錦濤摸面珠

鍾鎮濤和鍾懿兩父女前晚在國家主席胡錦濤面前獻唱，精乖伶俐的鍾懿在胡錦濤面前自我介紹，氹得對方俯身摸其面珠，大搶老竇和同場的張學友及陳慧琳等巨星風頭。

前晚在會展舉行的晚會，演出歌手包括張學友、容祖兒、陳慧琳、李克勤、葉蒨文及李玟等巨星，鍾鎮濤（阿B）則與囡囡鍾懿同台合唱。7歲的鍾懿不但沒怯場，完場前胡錦濤上台跟眾人握手時，口齒伶俐的鍾懿自我介紹：「胡伯伯，你好，我是鍾懿。」氹得胡錦濤笑容滿面，還烏低身摸她的面珠，可謂搶盡風頭。

阿姐揸咪伴唱

被女兒搶去風頭的阿B笑說：「事前冇教過佢，係佢（鍾懿）自己講，啲人話應該叫胡爺爺，其實冇所謂。」他表示首次近距離見到胡錦濤相當興奮。而曾任人大和政協的阿姐曾見過胡錦濤，故對方亦認得她。尾聲大合唱時，汪明荃（阿姐）不時遞咪給胡錦濤高歌，她說：「佢把聲洪量高音，係唱得之人，主席仲問我：『還可以嗎？』佢真係好謙，我話：『了不起！』」

不過，胡錦濤並沒冷落一班巨星，學友和阿姐被安排伴在他左右，胡錦濤跟各人逐一握手，其中李玟握得最久，有11秒之多，歌唱家莫華倫更跟主席四手緊握。李玟昨日接受本報訪問時說：「本來嗰日要去歐洲，我特登改機票，有機會喺胡錦濤面前獻唱，一生難忘！」