夫婿劉志敏：娟妹一生無憾

羅慧娟前日於新加坡家中逝世，62歲丈夫劉志敏傷心欲絕，癡情的他已準備自己將來的骨灰與娟妹同安放香港，永世相伴，他指娟妹曾對家人表示一生無憾！

憔悴的劉志敏昨日在新加坡翡瓏聖山所的優雅堂為太太羅慧娟設靈，強忍淚水的他接受訪問，透露自從兩年前娟妹診斷出患胰臟癌後，他在香港、內地和新加坡廣尋五位名醫為太太治療，還聘請專業看護照料。他說：「過去兩個月都喺新加坡靜養，一個月前娟妹嘅媽媽、家姐和哥哥都嚟晒！佢一直都喺醫院接受治療，一個星期前才返我哋屋企。尋日（前日）我同兩個仔喺睡夢中被看護叫醒，娟妹喺鎮靜嘅狀態下離開。」他已決定將娟妹的骨灰安放香港：「我將來亦要擺放香港，同佢放埋一齊。」

雖然娟妹一直都為自己準備好身後事，但劉志敏坦言一直不想面對，尤其靈堂內的短片：「啲片係娟妹三、四個前拍攝，佢希望喺靈堂播畀親友睇，佢一向都做定準備。我希望唔使睇，但依家都要睇，冇辦法。」他強調娟妹離開時很安詳：「非常舒服，好快，多謝關心。佢已經掙扎咗成十日o架啦！（併發症？）佢係胰臟癌。（停咗藥？）其實停唔停藥係睇出發點，有時身體都休息吓，點知停一停，停到去咗！」

履行娟妹遺願

娟妹的遺願，劉志敏答應會一一履行：「佢想多啲朋友接受主，有錢冇錢都開心，聰唔聰明都開心。娟妹走嘅時候唔係好辛苦，佢走得好舒服。（佢一生無憾？）你講呢句好有意思！我知佢走嗰陣對媽咪同屋企人講自己一生無憾。我覺得呢句說話……（沉思）我哋都自己諗吓自己點樣做人！佢叫我做個好老公，星期日帶兩個仔去教堂。依家一個仔已經結咗婚，佢希望另一個仔快啲搵到個好老婆，做個好教徒。」娟妹的遺照和墓前的相片都是由他精心挑選：「呢張相係三年前影，相中嘅娟妹面帶幸福笑容。」說到此時，他一度嗚咽，然後強忍淚水繼續說：「我都冇諗過佢咁早走。」

劉志敏最難忘2008年與娟妹北京度蜜月，當時他倆欣賞奧運閉幕式，他說：「娟妹其實唔係太鍾意運動，我當時同佢講：『唔係每一個人都可以送老婆一份咁嘅禮物。』去咗五日，每過一日娟妹愈嚟愈鍾意，到最後一日睇閉幕式嘅時候，娟妹好感動，佢仲同我講：『老公，送你一個大吻！』」

娟姊：佢走得安詳

其後娟妹姊姊羅慧蓮接受訪問：「呢幾個月有喜樂有悲傷，同娟妹度過好多開心嘅時刻，你知我個妹好樂觀，成日對我講笑，又成日打眼色、擠眉弄眼整蠱啲護士，特別鍾意整蠱佢老公。我妹夫成日畀佢玩到死，娟妹猛講笑話我妹夫係男護士，佢最鍾意呢個男護士，笑到成班人好開心。雖然娟妹有病，但佢反應好靈敏，個腦轉數好快，畀咗好多歡樂嘅時光我哋，走嘅時候都好安樂，我同媽咪、妹夫都喺佢身邊陪伴，佢走得比我哋預料中早咗少少。佢走嘅時候好安詳，冇任何痛苦，冇嗌到。佢突然身體出現狀況，心臟、血壓突然變得好犀利，抖咗幾啖氣，就安樂咁離開。」

娟妹生前與兩名繼子感情非常要好，大仔劉鎮洪昨日坦言還未接受到繼母逝世，他說：「我仲未接受到『媽媽』（娟妹）嘅離開，佢叫我哋好好照顧爸爸，星期四我哋會返香港，喺香港會有兩、三日儀式。」

生前曾變負資產

此外，娟妹去年接受台灣Good TV訪問，她回首前塵，提及1997年金融風暴慘變負資產，當時曾將七位數字款項交予朋友，替她返港辦理供樓手續，怎知朋友竟然私自挪用，款項至訪問時仍未歸還。娟妹又指潛水意外後，若及早求醫，尚可保住一半聽力，未至於只得兩成聽力，而飽受寂靜煎熬的她，變得抑鬱，2007年更試過二十日沒有進食，直至同年7月裝上人工耳蝸，抑鬱情況始有好轉。