泳兒鏈情多變
歌手泳兒近年愛上收藏各類飾物，其中以頸鏈佔大多數，數數手指花費近3萬元！雖然非全是名牌貨，但她獨愛珍藏品屬獨一無二，變化多端的設計，可隨心情及場合自行配搭，盡情發揮創意。
泳兒展示了其中18件收藏品，大部分為Handmade頸鏈，還有CHANEL心口針及古董閃石小手提包。細看泳兒的頸鏈，設計獨特兼款式繁多，有巨型水晶及仿珍珠鏈，還有造型可愛的動畫卡通人物，如煤炭屎鬼、黑貓咪及青蛙珠鏈等，不過共通點是設計誇張兼非常「大串」！她笑說：「咁先啱我哋出Function戴，如果太細條，影相就唔夠靚。為配合唔同場合，我買咗好多唔同種類同款式嘅鏈。」
平凡中顯不平凡
問到可會擔心長期佩戴「重磅鏈」會頸痛？泳兒搖搖頭說：「咁又唔會喎，全部都好輕身，戴足成日都唔會頸攰，最鍾意佢係防敏感物料，唔會皮膚敏感。」泳兒自言未入行前，性格男仔頭不愛打扮，故不會買或戴飾物，可是當歌手後認識了設計師Bell，自從對方送贈她第一條自家設計的頸鏈後，她就變得「無鏈不歡」，她說：「一條設計獨特嘅鏈，可以令一身平凡打扮變得不平凡，就算着淨色裙，但只要戴條誇張啲嘅鏈，成個感覺即刻唔同晒。」
最愛Sharp醒波波
問到最愛哪一條頸鏈？泳兒思索了足足10分鐘，才揀了由大小不同棉質波波組成的頸鏈，她說：「依家夏天嘛，梗係要戴色彩繽紛啲o架啦！但着晚裝，我會揀閃石同仿珠鏈，出Event就會戴啲得意嘅款式，同埋啲鏈可自行加長改短，一條鏈可以變化出三個不同款式！」
創意無限 眾星熱捧
泳兒鍾情的飾品設計師Bell，曾任職娛樂台新聞記者3年，因設計飾物的意念天馬行空：水晶及仿珠鏈時尚高貴；動畫卡通、金屬及珠鏈則玩味十足，故深受圈中人熱捧！Bell的捧場者眾多，包括容祖兒、Twins的蔡卓妍及鍾欣桐、鄧麗欣、周柏豪、鄭欣宜、Angelababy（楊穎）及文詠珊（Janice Man）等。
泳兒大晒的珍藏，全都是令她愛鏈成「癮」的源頭。
Colourful的波波鏈及仿珠鏈風格不同，但都是泳兒的「夏日精選」。
容祖兒
蔡卓妍
鄧麗欣
粗框頸箍夠晒突出，型格盡現。
閃石小手提包及CHANEL心口針都是泳兒鍾愛的收藏品。
用魚仔豉油樽做頸鏈，玩味爆燈，難怪成為泳兒的收藏品之一。
青蛙鏈勁Cute，不知會否青蛙變王子呢？
貓貓頸鏈是泳兒出Event的良伴！