Super GirlsSing吸宅男

新進跳舞組合Super Girls的五位成員均樣靚身材正，但她們不只是靠樣搵食，而且跳得又唱得，更為踏上舞台演唱的夢想而奮鬥，力證這並不是一場明星夢。

女子跳舞組合近年在香港樂壇買少見少，今年則有五位青春女生Aka、Cheronna、Yanny、Heidi及Jessica組成「Super Girls」闖樂壇，獲唱片公司打造成「港版少女時代」，單是名字已非常威水！

年底爭獎

對於「超級女生」的說法，隊長Aka笑言是每位成員的理想︰「我哋要畀人睇到付出嘅努力，而唔係諗住發明星夢，睇得亦都係識得唱歌嘅！」毫無疑問，五人擁有甜美的樣子，單靠靚樣已冧到不少宅男粉絲，但她們決意要以歌聲取悅歌迷！Jessica說︰「呢個係我哋五個嘅心願，外國好少成功組合，希望香港可以有更多。」而早前推出了新歌，Aka表示今次下了不少苦功，希望唱功和舞藝都能獲得認同︰「好想畀人知我哋係做到，識唱歌之外，都希望可以喺年尾頒獎禮分一杯羹。」Yanny則說︰「如果有一半人識唱我哋嘅歌，就算係識幾句，都已經好開心。」

對於今次勇闖樂壇，五人均信心十足，由於出道前已相處了一年，默契已不成問題，且大家各有性格，故有信心迎合觀眾口味，Cheronna說︰「大家有唔同嘅賣點，我比較鬼妹仔，Aka就爽直，Jessica非常搞笑，成日氹我哋！」身邊的Yanny笑言個腦轉數快，Heidi則說︰「我好嗲，所以佢哋都好錫我。」