Janice Man比堅尼乾煎

Janice Man（文詠珊）日前到馬爾代夫度假，不諳水性的她帶了4件比堅尼晒身材！她沒想過請黎明教游水：「我怕教極都唔識會激死佢！」

黎明愛將JM日前請了一星期假，到馬爾代夫享受陽光與海灘兼歎Spa，因為她去年拍了多部電影，今年初更忙於宣傳新片，又要兼顧Model工作，忙到喘不過氣，故相約好友去旅行叉電，回港再搏殺。

擁有Model身材的JM，特地帶了4件比堅尼影靚相，打算每天以不同泳衣上陣大晒健康性感，不過JM原來不懂游水，連朋友都取笑她有姿勢冇實際。問到為何知道老闆黎明（Leon）擅長水上運動都不請教他？JM笑說：「我擔心佢教極我都唔識，激死Leon就唔好啦！」

鯨魚水泡救命

為方便拍戲，JM表示想過學游水應付落水戲：「其實我細個時爸爸有教我游水，但佢就咁掉咗我落海，話驚就自然會學得識，不過我真係驚到死，唔單止學唔識，之後仲好怕水，每次游水都要用水泡。今次去馬爾代夫，我都帶埋鯨魚水泡，畀朋友笑足我幾日！」