JC游水浸熄慾火

「警鐘胸」女模Jessica C.與舊愛Sergio分手後被指有新歡，她出席活動時表示二人只是朋友，目前很享受自由自在的單身生活，又指現時不需要「性」，會以游泳及做運動分散注意力。

模特兒Jessica C.昨日谷胸出席《apm直播四強爭霸戰狂歡派對》，她表示今年不會推出寫真，希望集中發展電影事業。談到新歡，她笑說：「我依家好享受單身生活，以前自己對感情事太急，忽略咗家人同朋友，依家希望放多啲時間畀佢哋，不過佢係個好人！（依家咩關係？佢有冇追求你？）我哋第一次約會喺情人節，我喜歡愛同被愛，但現階段更享受自由自在嘅感覺。（享受自由嘅性生活？）我依家係個好乖嘅女仔，閒時我會游水做運動嚟轉移，我依家唔需要呢樣嘢！」JC又指母親及師姐Ana R.都很支持她，希望她早日找到幸福，而她則希望專注事業。

重視內在美

提到早前被拍得在舞男騷內跟肌肉男甚為親暱時，她說：「嗰次係我第一次參加呢啲派對，嗰晚玩得好開心，我自己都衝咗上台，我都睇見佢哋摸其他女仔。（鍾意肌肉男？）我喜歡健碩嘅男仔，不過依家我覺得內在美比外表更重要。」

另外，問到可認識涉嫌盜用名媛榮文蔚信用卡的男模顧志雅？她表示可能因工作見過面，也希望對方是無辜的，並指擁有信用卡的確很危險，前男友雖知道其信用卡密碼，但從不會亂用，只是打機玩遊戲才會碌她的卡，紀錄良好。