楊愛瑾避談婚期 驚食詐胡

前Cookies成員楊愛瑾，早前被拍得與永安太子爺男友郭永淳拍拖買大床，昨日她否認好事近，但對被指想組織4人家庭則十分受落，更稱如有拍片求婚會非常感動。

日前被拍得偕男友郭永淳買大床的「餅碎」楊愛瑾（Miki），昨日身穿Tube Dress為《液晶顯示屏AOC與Twentieth Century Fox Film》活動擔任嘉賓，宣傳動畫《冰河世紀4》及新產品，曾經為卡通片配音的她表示非常好玩，並稱雖有留意高科技產品，但多數只看不買：「我身邊有朋友鍾意追新產品，我都會受惠，例如佢買咗部新電視，我就叫佢送部舊嘅畀我。（有冇男仔用高科技追你？）冇，如果男友拍片求婚都會幾感動。」

提到早前被拍得與男友拍拖買大床，Miki尷尬地說﹕「人人屋企都有床，唔係好事近，佢純粹陪我買。（張床咩Size？）應該係King Size，我一個人住之後慣咗瞓咁大張床。（夠兩個人瞓？）四個人都得。」問到是否想組織四人家庭？她甜笑說：「結婚係開心事，但未有迹象。（幾時有進一步關係？）暫時以工作為重，啱啱同無綫更新咗份合約，冇時間搞其他嘢。」

咒自己嫁唔出

Miki又稱拍拖要低調，不過結婚就不怕高調，若有好消息一定會公布，她更百無禁忌地說：「如果求婚就唔公開喇！由求婚到結婚起碼一年時間，如果結唔成咪好肉酸？」