楊受成指師兄好笨：希望真係鍾意祖兒

容祖兒跟劉浩龍的戀情近日鬧得熱烘烘，「龍兒戀」曝光後，英皇集團老闆楊受成首度為事件開腔，直指劉浩龍在兩人感情未穩定前，率先公布戀情的做法：「好笨囉！」

樂壇天后容祖兒入行多年，一直專心工作，鮮有提及感情事，日前卻被爆跟劉浩龍（師兄）拍拖，迅即成為傳媒追訪對象。對祖兒「錫到燶」的英皇集團老闆楊受成，終於對事件開腔表態。

昨午，大批傳媒聚集在灣仔的英皇集團中心外，等候在上址開會的祖兒。下午五時，楊生返回公司期間見到記者守候，主動在門外接受訪問，笑容可掬，有問必答，以下是記者跟楊生的對答內容。

記：記者　楊：楊受成

記：外界覺得劉浩龍嘅身份、地位同祖兒唔配？

楊：感情嘅事唔應該分等級、財富。

記：你接受到佢哋拍拖？

楊：最緊要係祖兒開唔開心、對方係咪真心鍾意佢、亦都係咪真係對佢好，總言之佢開心我就開心嘞！

唔識劉浩龍

記：祖兒有冇同你交代拍拖事件？

楊：我諗唔需要啦，咁大個女，使咩呀！希望佢開心，對方真係鍾意佢，冇其他目的。

記：你咁講係咪真係有擔心祖兒同有疑問？

楊：我哋咁錫佢，梗係會擔心佢，我哋只希望容祖兒本人，搵到真正嘅伴侶，真正錫佢嘅人。

記：你對劉浩龍印象點？

楊：我唔識佢。

記：佢入行15年喎？

楊：我同佢冇乜交往。

記：將來佢哋拍拖，你咪成日見面？

楊：（開懷大笑）唔知呀！

記：你恨唔恨祖兒拖劉浩龍見你？

楊：呢個係睇祖兒本人，我邊有資格講。

記：你係老闆，可以提議？

楊：你老闆可唔可以命令你做咩吖？

記：你唔管佢（祖兒）㗎嗱？

楊：咁大個女，講真十年前會畀意見，今日唔會。

記：送佢哋祝福？

楊：希望佢開心，佢搵到鍾意嘅嘢囉，同埋希望對方真心鍾意佢，唔係話有其他目的。

高調晒愛鹵莽

在場記者本以為楊生已發表完畢時，此時楊生卻作出補充……

楊：查實對方（指劉浩龍）都好笨，咁早將件事都未穩健、未成熟就講出來，好笨囉！

記：覺得佢借祖兒宣傳？

楊：（即收起笑容）咁呢個我唔敢講，佢有咩目的我唔敢講，只覺得佢笨。

記：覺得浩龍公開戀情太高調？

楊：如果佢珍惜開始，珍惜呢個階段，係唔應該講；如果佢珍惜嘅，我覺得佢好鹵莽。

其後，楊受成步入公司，直至晚上七時許才離開。但在場記者欲上前再採訪時，他即示意說：「唔講啦！講咗。」