鍾舒漫跨時空追夢

自小喜愛Little Twin Stars的鍾舒漫，原來自投身社會工作後，才開始四出搜尋相關的精品，但她向來精打細算，堅持實用為主的原則。

女孩子都愛收藏卡通人物公仔和相關的產品，大女孩鍾舒漫（Sherman）亦不例外，當身邊人紛紛以收藏Hello Kitty為榮時，Sherman卻偏偏對Little Twin Stars情有獨鍾：「讀書時期已經好鍾意Little Twin Stars，可惜零用錢唔多，所以當時都只係得個恨字。」

助手笑低能

Sherman入行當歌手後，開始有經濟能力，故四出搜羅有關產品：「以前見到身邊同學個個都用Little Twin Stars文具都好羨慕，依家有能力買番，算係少少嘅心理補償。」雖然喜愛，但要她出錢買的原則全以實用為主。

成為藝人後，Sherman每次外出工作都要帶大量化妝品及雜物，並放到各款印上Little Twin Stars圖案的大小盒子和化妝袋：「連食物袋都係Little Twin Stars，我助手試過嫌個款低能，唔肯幫我拎！」即使被取笑，她仍堅持使用。

在眾多收藏品中，Sherman認為中學的紀念冊最珍貴：「入面寫滿所有中學同學對我嘅感受，同埋地址電話，依家都會間中睇番回味吓。」

難忘嬌心意

而歌迷亦熟知Sherman的喜好，故特地製作「Little Twin Stars X Sherman」的相片集，令她非常感動！

對於印象最深刻的收藏品，Sherman不得不提一對巨型的Little Twin Stars公仔：「呢對公仔係阿嬌（鍾欣桐）送o架，話說有年頒獎禮，阿嬌突然同我講話有禮物畀我，原來係佢行街見到，諗起我鍾意就買咗畀我，嗰刻真係好感動！」

唔戴「貴」錶

雖然Little Twin Stars的精品五花八門，但鍾舒漫一向堅持貴精不貴多，在眾多收藏品中，歷史最久遠的要數其星形的跳字手錶，她說：「隻錶係絕版貨，依家已經冇得賣，係我一個朋友專登去啲舊式文具舖搵o架，真係珍貴到我都唔捨得戴呀！」