謝安琪掙扎 黃貫中認命

小時候，老師總教我們凡事要好好計劃，但又有多少次可依計行事？7年前，謝安琪由寂寂無聞的歌手變為樂壇新星，豈料在事業登上高峰之際患上抑鬱症；今年初，密謀求婚之旅的黃貫中獲女友朱茵「報喜」，憤世Rock友突然變老襯！

上帝創造人類，對每個人的恩賜都不同，就像謝安琪（Kay）天生一把靚聲，一曲《囍帖街》唱到街知巷聞，更榮升「天后」。然而上帝亦告訴Kay，天色並非常藍，人生每多變幻，當她闖上事業高峰，一把又一把聲音將她推倒，這就是人生。

七年前，當時27歲的Kay加入經理人夏森美和周博賢的小型公司，那時候她只需唱喜歡的音樂就行，簡單又快樂。後來靚聲備受關注，於是稍稍包裝後就出道，但仍是箍牙妹一名。大概因為她受訪時沒太多笑容，加上有話直說，故被認定是「臭寸一族」。其後她加入環球唱片兼與張繼聰拍拖但未婚懷孕，受盡冷嘲熱諷。明知入得娛樂圈，做人要夠「圓」，但她有時寧願選擇沉默。回想當初，Kay沒後悔，只是回憶仍然歷歷在目：「入行七年，我依然好直接，記者問我無理嘅問題，我依然會好直接咁答，我唔會好主動去澄清我係點嘅人，我只係呢個圈中比較唔圓滑嘅人，但我都係憑良心尊重每個人。」

靠信仰抗抑鬱

看似倔強，其實Kay過去亦因這些傷害而深深不忿，更因而患上抑鬱症及思覺失調，嚴重得想死：「當時覺得好無辜，外面好多負面批評，個人好低落，困住自己幾日，連老公都唔畀入房。有一晚，我喺間房聽到好多把聲，有男有女叫我去死，問我做乜仲喺度，不如去個窗度跳落去！好彩當時我仲識得跪低祈禱，過幾日去睇醫生，證實呢個病係抑鬱症同思覺失調，我慶幸自己樂天底，食咗半年藥就好番。」

離巢尋回自我

如今Kay跟環球已宣告「分手」，是和平與否大家心知肚明，不過她至少可以再次做回自己。有傳她獲星煥娛樂邀請合作，Kay卻不置可否：「其實未定，要同經理人商量，最緊要大家音樂理念一致，如果搵唔到好公司，我哋可以回到以前，自己一手包辦。」至於當初因為環球與無綫的版稅風波，令她背上「首席無綫叛徒」之名，如今雨過天青，更有傳她即將亮相無綫，其經理人代答：「有初步傾過，不過未定。」

後記：學會苦中求樂

人生有太多苦與樂，當痛苦的時候，何不苦中作樂？基督徒Kay多得抑鬱症等經歷，令她明白「天色非常藍」，這是上帝對世人的考驗。雖然她的音樂命途多變，亦未知花落誰家，但最近她密密賺，以7位數字成為金酵素代言人，更獲靚女老闆娘Amy厚待，訪問當天獲贈名牌銀包，大概她今天應該很高興。

對於黃貫中（Paul）而言，2012年可謂驚喜一浪接一浪，浪漫的Paul早已向女友朱茵成功求婚，今年初着手籌備婚禮，他計劃與朱茵環遊世界，遇上她喜歡的地方，就在該處簽婚書，結束15年愛情長跑。Paul坦言生兒育女並非在計劃之內，豈料朱茵突然告訴他：「我有咗！」令自以為計劃周詳的他陣腳大亂，可幸的是喜多於憂。

「我成日大大聲話地球資源唔夠，叫人唔好生仔同自己爭食，加上我唔想阿茵咁辛苦佗BB，所以Plan好唔生仔，歎夠二人世界咪領養孤兒囉！我哋會當係親生仔女咁愛錫。點知阿茵突然話有咗！我呆咗！原來唔止係天有眼，仲天有耳！做人講嘢唔好咁盡，個天聽到o架！你咁口響？畀個B你，睇你點算！哈！我都有今日！」

「白婚紗行禮？No！」

以為對一切瞭如指掌的Paul，連相處10多年的女友對婚禮的要求都估錯！他說：「我幻想阿茵會希望着白雪雪嘅婚紗、喺莊嚴嘅教堂行禮講『我願意』，點知佢扁晒嘴話：『唔着婚紗得唔得？好似接通告（拍戲）咁！』」於是他便找來星級攝影師夏永康為他們拍全裸「婚照」公告喜訊。喜歡攝影的他原本打算親自操刀：「但阿茵係完美主義者，影相嗰日我要照顧佢，點可以分身兼分心？呢輯相累我畀朋友鬧，因為佢哋畀另一半逼減肥，要照辦煮碗影番輯！」Paul曾想過為朱茵拍大肚寫真留念，但遭貪靚的她拒絕。

「預咗做奸角？No！」

Paul坦言刻意避開不問BB的性別：「醫生問過好多次使唔使睇吓BB嘅性別，但我想保留神秘感。阿茵講明無論仔定女，佢都要做『忠』，我就做『奸』。冇法啦！佢大晒！不過如果生女，我預咗『奸』唔出，因為一個阿茵我已經抵擋唔住，嚟多個我仲唔投晒降咩？我一定係呷醋外父。嘩！Mini版朱茵喎！溝死仔啦！讀BB班已經要（目及）實，邊個埋身就『逗』佢！如果係仔，我會同佢講道理，打？講就易，一定唔捨得！」

後記：High到難以平復

早在朱茵通知Paul懷孕之前，他的經理人已「入紙」，定於下月於紅館開騷，他說：「經理人畀晒訂金先同我講話開紅館騷，勁驚喜啦！仲要同Orchestra（管弦樂團）玩喎，梗開心啦！知埋阿茵有咗，試問我情緒點可以平靜？到依家仲好High！我都係第一次全盤計劃被敲破得嚟又咁開心！」