唐寧強吻囝囝解相思

忙於拍王維基新劇的唐寧，日前現身中環睇中醫。她笑言由於個多月來密集式地拍劇，故連見囝囝的時間也沒有，每天只靠母親傳來囝囝近照望梅止渴。

藝人唐寧近日忙於與林嘉華等拍攝王維基新劇《驚異世紀》，由於全劇採用實景，為令拍攝效果更完美，劇組每每花費比一般劇集多一倍的時間來打燈，拍攝時間亦因而延長。據知唐寧因此連續個多月來日接夜、夜接日地開工，高峰期更一天只睡兩小時。

睇中醫補「童顏」

不過，薄施脂粉的唐寧日前現身中環閒逛時，依然容光煥發，絲豪沒有捱殘的迹象。她全程玩電話，未幾即步入一幢大廈，逗留個多小時才離開。唐寧事後接受電話訪問時笑言當日是去看中醫，問到是否因拍劇捱殘要進補？她說：「唔好講到咁慘，我中間都有一兩日休息。一直都有睇開中醫，見嗰日拍劇途中有Break咪去睇吓囉！做演員梗係要養好身子，唔係邊有體力應付日夜顛倒嘅工作？」

唐寧近日忙於拍劇，幾乎沒有時間湊仔，每天除靠母親WhatsApp囝囝近照外，她亦爭取時間親近囝囝：「雖然好掛住個仔，但佢因為有太多人錫，唔多在乎我喺唔喺度。但我唔理，日日照樣強吻過佢先安樂，哈哈！」