唐詩詠任Jason摸獻嘴索吻

唐詩詠與陳智燊在新劇《衝呀！瘦薪兵團》中首度演情侶，詩詠踢爆「師弟」怕醜，拍親熱戲時既不敢摸又不敢咀，要她主動開口，被迫「猴擒」一次！

按入行時間計，唐詩詠可說是陳智燊（Jason）的「師姐」，但Jason在年齡上卻是她的「哥哥」。Jason笑言拍攝期間多得詩詠提點，大讚她細心及懂得照顧別人，問到詩詠是否他心中那杯茶，他笑說：「都OK嘅，但冇再進一步！」二人成為朋友，更不時約食飯，Jason說：「但多啲朋友一齊，會多啲嘢講囉！」

Jason對詩詠讚不絕口，但詩詠卻不時取笑他，更爆大鑊指他拍咀戲時非常怕醜，又不敢摸她：「我Feel到佢好緊張，有場戲講我哋拍咗好耐拖，走嗰陣Goodbye Kiss同拖手。我叫佢錫我，但佢只錫我額頭，我話『唔係呀！正式嗰陣你錫我個嘴啦！』。佢真係好怕醜，有啲氹我嘅戲份都唔敢摸我，要我開口問『你可唔可以摸吓我？』，搞到我好似好猴擒咁！」

尋初戀感覺

她笑言熟落後，Jason漸漸變得好煩，到最後更要喝才識停：「雖然第一次合作，但我好容易搵到佢嘅優點嚟鍾意佢，佢份人好細心，識得照顧人，彌補咗佢嘅低能。佢仲好有潛質，我哋拍攝時，25歲以上嘅女性都會望住佢！」問到會否喜歡這類「可愛大男孩」，詩詠直言Jason有初戀男友的影子。