李嘉欣入院開刀 腸胃割8瘤

剛度過42歲生日的李嘉欣，昨日透露老公許晉亨送了一份「大禮」給她，就是一個身體檢查，更發現腸及胃生了8粒瘤，要即時切除，幸而沒有大礙！

前日42歲生日的李嘉欣，昨日出席首飾品牌活動，身穿白色吊帶裙的她看來消瘦了一點，原來是剛接受手術！她自爆老公許晉亨送了一份難忘的生日禮物給她：「今年有好多小病小痛，所以老公送咗個健康檢查畀我，佢知我諱疾忌醫，就搵埋醫生幫我做咗個超詳盡嘅身體檢查，照埋內窺鏡，發現腸同胃有8粒良性嘅瘤，即刻切除咗！（微創手術？）都算係，雖然係良性，但唔知將來會有咩變化，所以愈早切除愈好，令我清除疑慮，老公好大功勞！」難怪前年曾接受小手術的她，笑言生日願望只有身體健康，別無所求！

呻被囝囝恰

問到寶貝仔有何表示，李嘉欣笑說：「錫啖我囉！都係繼續恰我，我喺度時佢特別扭計。（點慶祝？）同老公、老爺同奶奶食飯，囝囝瞓咗覺冇去。」她表示暫無意多追一個小朋友，因覺得在港養小朋友很艱難，負擔很重。她已開始為囝囝搵學校，打算待囝囝12歲便送他到外國留學，但絕不會帶囝囝出埠旅行，笑指囝囝待她如工人，比1年拍11部戲更辛苦！談及早前有報道指她小產，她再度否認並說：「大吉利是！」