輸家鍾麗轟賽制殘忍等「復活」

前日無綫安排港姐以互選方式揀出被Foul佳麗，慘遭踢出局的鍾麗及陳華鑫狠批賽制殘忍，而身材最豐滿的曾明俐則直入決賽！統籌經理余詠珊表示或會舉行復活戰，讓落選者翻叮！

今屆港姐以真人騷做噱頭，16位在倫敦拍外景的佳麗玩分組賽，前日落敗一方要再Foul兩人，更突然宣布是由佳麗互選，最終陳華鑫及「浴照佳麗」鍾麗冇得留低，但會先跟嘉賓陳百祥到處「散心」，今日返港，前日兩人還要隨隊到大笨鐘拍攝，相當殘忍！

對於佳麗互片，鍾麗黑面大表不滿，認為不公平及殘忍：「突然叫我哋揀，都唔識揀，揀完可能後悔！（大會唔負責任？）梗係啦！佢哋揀唔到，我哋仲難啦！」她表示揀了自己出局，因自覺被負面新聞拖累。而心情較輕鬆的陳華鑫亦認同唔知點揀，只靠「點指兵兵」：「被Foul可能唔夠高又唔夠靚。（之前係後補佳麗，覺得被玩多次？）咁諗仲唔開心！」

不過，大會副統籌經理陳家揚不認同規則殘忍，會安排工作給落選佳麗，問到會否怕質素高的佳麗出局？他說：「唔會，質素咁平均，我哋都好難揀！」而大會統籌經理余詠珊表示或會在決賽前舉行復活戰：「如果真係Out咗最靚嘅，都唔使擔心，可能畀出局佳麗比賽多次。（佳麗不滿！）我哋諗嘢叻過佢哋，玩多次可能贏到，都有機會畀大家睇係咪實至名歸。」對於或有復活戰，鍾麗大表贊成，認為冇壓力一身輕，相信會做得更好！相反陳華鑫信心欠奉怕再被Out！至於陳百祥則認為賽制做到汰弱留強。同樣憑復活戰反敗為勝的2007年港男冠軍袁偉豪認為此賽制甚有娛樂性，但明白參賽者心情會更忐忑。

曾明俐唔敢慶祝

此外，大會宣布Top 3佳麗是曾明俐、張名雅及湯洛雯，當中分數最高的曾明俐直入決賽，不用擔心被淘汰，她認為優勝處是有做Gym操弗，問到是否與上圍最豐滿有關？她說：「都OK！（慶祝？）唔會住，都唔可以話冇晒壓力！」而張名雅不覺賽制殘忍，認為是一項挑戰，亦不擔心因負面新聞而被Foul。