阿Sa飲大兩杯鞋都剝埋

天后容祖兒前晚在上海開P慶祝32歲生日，好姊妹蔡卓妍（阿Sa）醉賀師姐，飲到面紅紅之餘，更High到剝鞋！至於自爆在感情方面「開竅」的祖兒，昨日宣傳新片時搞笑地向胡歌索取「Birthday Kiss」！

容祖兒前日身穿火紅長裙亮相上海國際電影節紅地氈，為英皇電影《DIVA華麗之後》造勢！適逢32歲生日，出席電影節後，她即與經理人霍汶希歎上海菜，再轉場到英皇老闆楊受成包下的酒吧開P，到賀的包括Twins、成龍及胡歌等。祖兒滿場飛與賓客舉杯暢飲，好姊妹阿Sa飲到面紅耳赤，更大發嬌嗔指祖兒灌醉她，受訪時又High到剝鞋遷就阿嬌高度，難怪事後在微博自嘲「醉Sa」！

心情靚爆的祖兒，不介意自爆年齡秘密，她笑說：「今年32歲，但心裏永遠23歲！返港後會同媽咪食飯補祝。」問到是否想結識上海男友，她說：「我係土生土長嘅港女，要喺香港搵個臭味相投嘅男仔，冇諗過跨境搵另一半。（有人追？）呢方面我超級唔敏感，好鈍胎，不過今年已比往年好，多番敏銳感。同事話有啲人對我有好感，我唔覺，但依家會慢慢加感覺。」她還自爆前一晚已喝醉：「今晚咁多前輩，唔想出醜，冇食解酒藥，喺前輩面前要淡定少少。」

阿嬌嫌床戲太悶

至於阿Sa則被拍檔鍾欣桐（阿嬌）踢爆情迷日本型男福山雅治，阿Sa說：「我讀書時睇《同一屋簷下》已經鍾意佢，當時仲同同學仔鬧交爭『老公』，但依家有新偶像。（陳偉霆？）唔講你哋知！」記者笑她不再是少女，她帶醉反駁：「我仲係少女，我鍾意食雪糕！」而阿嬌則表示已送了新電話給壽星女，談及在內地劇中有纏綿床戲，她說：「只係錫塊面一啖，我覺得嗰場係好悶同冇嘢嘅床戲。」而另一醉貓鍾麗緹在數名保安護送下離開，見她面紅傻笑兼用手掩耳，但記者上前採訪時被保安阻擋。

收「DIVA」電話殼

此外，祖兒昨日與胡歌出席電影《DIVA華麗之後》記者會，獲大會送贈蛋糕及3個有「DIVA」字樣的電話殼，她主動篤面珠示意胡歌獻吻，但胡歌不明所以，要祖兒開聲話要「Birthday Kiss」才醒水，事後祖兒笑指胡歌未遇過主動女生，胡歌即說：「常常遇到，只是剛才來不及反應，我反應較慢！」祖兒表示拍戲很開心，但經常被胡歌及杜汶澤取笑「菠蘿」，她解釋：「佢哋話我八卦同死八婆，因為有時我睇佢哋短訊同電話，佢哋索性反轉部電話唔畀我睇！」而霍汶希、阿嬌及阿Sa分別在微博上載與祖兒的合照，阿嬌更送上大紮鮮花。