余少寶開舖老公降Grade
前港姐余少寶首次開舖做老闆娘，在元朗開設法式甜品屋，她說：「以前喺法國讀書學咗好多烹調技巧，返嚟香港食過啲法式食店後，我就決定自己開。今次投資六位數字，揀喺元朗開舖因為近我法籍廚師姐夫，佢畀好多意見同支持我，另外都睇中元朗人識飲識食，本來預期今年回本，但應該可以提早，下一步計劃喺深圳開分店。」她指為了開舖，將老公降至第3位：「依家生意排第一，高爾夫球排第二，老公排第三，呢期我仲要打高爾夫球比賽，唯有盡量抽時間練習，依家忙過以前做少奶好多，但又充實又開心。老公都好支持我開舖，佢出錢出力出心，我打算8月趁佢生日同佢旅行。」
余少寶開舖，法籍姐夫（右一）偕老友撐場。
余少寶忙於打理生意之餘，還要抽空練高球。