蔣家旻闖娛圈 感激爸爸支持

羅天宇和蔣家旻最近經常孖住在電視螢幕出現，因他們在處境劇中飾演兩兄妹。父親節將至，充滿孝心的他倆特意為爸爸炮製愛心父親節餐，希望父親每天都開開心心！

最近在處境劇內飾演兄妹的羅天宇（Joey）和蔣家旻（Angel）趁父親節將至，日前落手落腳炮製愛心父親節餐孝敬爸爸！當天Joey負責切材料，Angel則負責打蛋，雖然在過程中一度失手煎燶雞蛋，不過仍無損士氣，最終完成製成品，把材料砌成父親的笑臉，寓意爸爸每天都笑口常開！

Joey坦言照顧他長大的雖然不是親生爸爸，但亦視他為「親爸爸」，又笑言因小時候太百厭，被父親打到「褲都甩」：「細個呃佢話做完功課，然後走咗去瞓覺，點知畀佢發現咗，結果驚到由廳跑入房，跟住佢撳低咗我，除咗我條褲，然後用衣架打我，結果條痕仲留咗一個月，真係好難忘！」

獨生女受盡寵愛

而獨生女Angel雖然沒跟兄弟姊妹玩耍的童年回憶，不過她笑言爸爸對她寵愛有加：「當初入行，媽媽係比較反對，反而爸爸知我鍾意做戲，都會叫我嘗試。我覺得最窩心嘅係爸爸知我有近視，有時又唔戴隱形眼鏡出街，我每次出門佢都提醒我：『出街一定要注意安全，小心睇車呀！』」