翠翠仆裂腳背骨搵高鈞賢呵番

葉翠翠在橫店拍劇期間不慎在酒店房間跣倒以致右腳腳背骨裂，與緋聞男友高鈞賢一樣受腳傷之苦，翠翠坦言受傷一刻以為自己「癱咗」！

前港姐葉翠翠到橫店為無綫新劇《金枝慾孽貳》開工一天後，在酒店房間不慎跣倒拗柴，右腳腳背骨裂。昨日她撐拐杖現身下榻酒店，並表示已照X光，醫生指她需要打石膏約兩個月，但為免失去拍攝機會而決定不打石膏：「劇組安排今個月19號之後先拍我嘅戲份。」

以為會癱似末日

她表示未知同劇演員、緋聞男友韋家雄是否知道她受傷，但已聯絡另一位同樣受腳傷困擾的緋聞男友高鈞賢：「我有問佢點做，依家除咗佢，真係冇人明白我嘅苦況。拗柴當時以為自己會癱，好似世界末日咁！依家沖涼都要彈吓彈吓咁行去。」

對於有指翠翠頻頻NG而惹同劇的蔡少芬不滿，她說：「我同當地演員拍咗一日，同佢（蔡少芬）未有對手戲，加上當時佢都未到橫店，我對報道一笑置之。」另外，高鈞賢接受本報訪問時說：「佢（翠翠）冇打石膏，我叫佢唔好亂用力，我好明白佢，因為我都好慘，依家每次沖涼最少都要半個鐘！」