徐淑敏：老公預百幾萬畀我敗

正當以為徐淑敏（Suki）成為人妻後，即使不待在家中相夫教女，亦只會繼續在娛樂圈打滾，但胸懷大志的Suki不但要做藝人，更已磨拳擦掌染指扮靚生意，做一個女強人。

上一篇我話自己信風水，師傅講過我喺黃金十年就算唔做娛樂圈，都可以做生意同投資。冇錯！相比娛樂圈，我更希望做生意，因為自小就有份使命感，見朋友畀人蝦會挺身而出，依家大個咗有經濟能力，想用自己嘅能力改變過去嘅扮靚思想，所以選擇做扮靚生意。

崇尚自然美

扮靚係我強項，香港女仔又鍾意扮靚，如果唔做美容生意可以做乜？之前我大肚，好多護膚產品都唔用得，朋友介紹我做香薰治療，效果比幾千蚊嘅護膚品好幾百倍，點解人要違背大自然，而要用化學品？就好似人奶一樣，明明有奶水，點解唔餵人奶呢？人類依家已經漸漸忘記簡單生活，離經叛道。

其實做女強人都幾好吖！依家我有積蓄，又有老公支持，更可以放心去做。但我做生意真係唔想衰，因為唔想畀老公覺得我蠢，不過佢真係好體貼，唔會講啲我唔鍾意聽嘅說話，但我知佢一定預咗一百幾十萬畀我敗o架喇！咁更加要證明我係得嘅！

徐淑敏就係一個唔服輸嘅人，要做到嘅嘢，就一定要做到，失敗一次唔緊要，最緊要唔好再衰，好似一盤棋咁，以為黑子冇晒，原來係割去毒瘤，創出一片天。狄更斯講過，最壞的時候，即係最好的時候，我做生意好唔好，將來自有定案。（全文完）

後記：有借有還上等人

Suki選港姐時，小記已認識她，從沒想過她嫁得快、生得快，轉數也那麼快地去做生意。有次飯敍，她竟沒有帶銀包，小記不禁笑她：「你做生意死硬，呢餐我請！」三日後她竟全數飯錢歸還。是我錯了，Suki做生意這麼均真，已是成功的第一步。

口述：徐淑敏　筆錄：專案組