「便便」做隊長 湯洛雯「釘」實

《2012年度香港小姐選舉》一班準佳麗前日到倫敦塔橋拍外景輪流瘀爆，先有湯洛雯因太冷而「飛釘」，再有卞曉帆因姓氏讀音被起花名「便便」，令在場眾人失笑！

十六名準港姐佳麗前日在倫敦拍攝首日外景，繼續面對殘酷淘汰戰。外景嘉賓陳百祥（阿叻）選了大熱湯洛雯和卞曉帆做隊長，以便二人分組作賽篩人。有星爸湯鎮宗做後台的湯洛雯不覺有優勢，更陣前失守「飛釘」！她強調阿叻並不認識其父湯鎮宗：「可能阿叻睇報道認得我啫！（怕被針對？）唔會！我哋相處得好好。（優勢？）到我着泳衣出嚟就知我冇！（你有冇叫卞曉帆做『便便』？）冇呀！我叫佢英文名！」

問到可知「便便」等於「屎」？卞曉帆反問記者有否其他意思，還說：「我唔介意，當我係好朋友先會咁樣叫！我冇唔開心！（選隊長有咩準則？）我會令班女仔Close啲，大家可以傾對策。（同湯洛雯對立？）唔會，之前揀人時大家都好禮讓。」

凍到搓手玩催眠

由於倫敦氣溫只得攝氏13度，怕凍的林泳淘和李渼琪要互相搓手取暖。稍後要以泳裝上陣拍攝，林泳淘惟有頂硬上：「我只好催眠自己啦！（着泳衣有咩準備？）再減十磅，依家已經戒食消夜，呢兩日開始六點後唔食嘢！」另外，李渼琪因廣東話不流利，每次拍攝都要工作人員多番講解，但尚算跟得上進度。