糖妹有錢途 李卓庭Loan爆

不少樂壇新人初出道時表面風光，背後卻要孭債度日！2007年出道的新人金獎得主李卓庭，過去一年零收入，但仍要還舊公司的逾30萬元債；相反曾向公司借10萬元的糖妹，因榮升「宅男女神」而密密吸金，已經還清款項！　

世界難撈！樂壇新人入行時收入不多，但為了置裝、交通費及學唱歌演戲，往往要向唱片公司墊支，不少人入不敷支！曾於2007年橫掃樂壇新人獎的李卓庭（Eunix），雖然一度風光，但背後卻孭債度日！她昨日受訪時坦言在第一間唱片公司3年內墊支逾30萬元，當中包括整頭、化妝及車錢等：「入行後第一年最多嘢做，因為當時攞咗新人獎，點知舊公司幫我開價太高，成萬幾蚊一個騷，結果冇人搵我做嘢，喺冇宣傳情況下出碟，好慘！」

起碼再還6年債

Eunix慨嘆舊公司替她出了3張專輯後便冇Job，最後解約收場，之後她轉投另一間新公司，惟亦因工作量不多而解約：「同第一間公司借嗰筆錢仲未還完，每個月要還幾千蚊，起碼要還多6、7年，由新經理人代還！（還錢畀經理人？）暫時唔使住！」她坦言過去一年零工作、零收入：「我有返『歌手團契』做分享及見證工作，教會畀番奉獻，大約500蚊，但幫唔到生活費，惟有靠家人！（再出碟？）睇吓經理人肯唔肯投資，我寫咗兩首歌，希望8月可以開3場音樂會搵錢！」

至於去年勇奪最有前途新人金獎的糖妹，入行時亦曾向唱片公司借下10萬元歌唱堂、戲劇班及置裝等費用，幸她人氣高企密密吸金，已還清債項：「除非係大紅大紫嘅明星，一般新人收入唔多！我生活好樸素，平時都係搭港鐵，路人都問：『你係咪阿妹？』我唔覺得尷尬，有時都諗周潤發都搭啦！」她不介意被指是平民化藝人，因她亦喜歡茶餐廳文化。

HotCha同公司拆帳

日前有雜誌指日模松岡李那想溝Dominic，身為正印的糖妹，前晚與HotCha、鄭融等錄影《勁歌金曲》時表示與松岡是朋友，問到Dominic是否備案？她說：「知呀！」但她表示要靠記者看實男友。而HotCha表示出道時，公司亦會提早出糧：「唔可以話係借，只係完咗一個Job喺份糧扣數！公司幫我哋接Job，依家自給自足，同公司拆帳！」