神婆徐淑敏：只揀好嘅嚟聽

徐淑敏（Suki）參選港姐時曾被指擺風水陣催谷人氣，赫然發現她原來是神婆一名。不過，對於任何劫數，她也選擇「掩耳盜鈴」，全因不想被負能量影響每一步棋。

我係一個篤信風水命理嘅人，記得讀書時已經Take風水Course，老師教得好好，令我知道風水唔係迷信，而係統計學，係一種好有科學性嘅學問。我睇命理唔只純粹睇結果，係希望從中得到正能量，每當我遇到困難，甚至遇到絆腳石，但因為我早就知道唔會遇到大風浪，所以都唔會畀負面情緒影響，幾艱難都可以一一捱過。

記得當時老師同我批命，佢知道我性格係「掩耳盜鈴」，所以佢從來都唔會同我講有乜劫，最多只係同我講小心交通、唔好遠行同小心身體等嘅叮囑說話。有一次，佢同我講小心身體，嗰年已經好注意健康，但都避唔過連場病痛，真係唔信邪唔得。

我雖然學過風水，略懂乜嘢叫「巒頭理氣」，但我只係小學生階段，只懂皮毛。每次師傅同我睇風水，我知道佢會講乜，但若然要我擺陣就要花好多時間鑽研，所以我自己都係聽住去做多，消化咗再去分析，唔會盲舂舂人哋叫我做乜就做乜。

被批演足30年

之前有師傅同我講我屬木，需要火，所以好適合喺娛樂圈發展，佢仲話如果我處理得好，起碼可以喺呢個圈做30年，21歲到31歲更加係我黃金年齡，開始行大運，年紀愈大，條路就會愈順。先前講過我係一個選擇聆聽嘅人，只會揀好嘅嘢嚟聽，我唔聽衰嘢都係想令自己開心，我就係咁樂觀嘅一個人。

（明日待續）

口述：徐淑敏　筆錄：專案組