Suki樂做咪神：好接受個名

無綫姐仔徐淑敏（Suki）與「咪神」這個稱號掛鈎，即使身材被標籤成特徵，Suki依然Enjoy，原來與台模林志玲有關！

眨眼就6年，見到今年港姐又面試，就回想當年自己參選嘅日子。講真，如果唔係參加選美，都唔會有今日嘅徐淑敏，到依家嫁咗人，仲有大把人叫我做「咪神」，真係好好笑！

突然多咗男粉絲

諗番當初，其實點解我會有（咪神）呢個稱號呢？因為當年台慶，公司安排冠、亞、季軍（分別為陳茵媺、周家蔚及呂慧儀）同我呢個旅遊大使上台。你知啦，當時我哋4個女仔仲未有Sponsor（贊助商），咁就要着公司衫，點知同事就畀咗件中門大開嘅衫我，當時我仲肥嘟嘟，都「浪」得起件衫嘅，「咪神」呢個花名就係咁嚟！

我一向都好鍾意台灣第一名模林志玲，佢樣靚身材正唔使多講，「咪咪」個名由佢而起，所以我都好接受呢個名，Cute Cute哋嘛！由細到大都冇人咁稱呼我，當初有啲尷尬嘅，不過新丁入行有個朵都係好事，始終多人認識你，咪神咪神琅琅上口，突然間多咗好多男粉絲，不過只得男粉絲囉！

美貌不及靚家姐

講到美貌，自細家姐都喺我之上，加上佢性格活潑，向來都好討人歡喜！為證明自己唔差得過家姐，所以讀書嗰陣就去做Model，可惜嗰時我個樣好老土，塊面又大又鬈毛，連自己都接受唔到自己！好彩天賜運氣，大大吓個人順眼咗，自信就返晒嚟，由一個唔敢同人接觸嘅人，變成開朗少女！（明日待續）

口述：徐淑敏　　筆錄：專案組