千嬅餵奶冇難度

楊千嬅一家三口溫馨全家福首曝光！千嬅的囝囝Torres眼仔睩睩似爸爸，其富貴「段鼻」似足媽咪！千嬅自言有湊仔根底，餵奶冇難度，老公丁子高則化身「試毒」銀針為她試食陪月餐。

楊千嬅上周二剖腹誕下愛子Torres，其所屬公司昨日發放其一家三口的照片，千嬅及丁子高望着囝囝一臉幸福；而Torres表情多多，更伸脷微笑！Torres眼睛似爸爸，並與千嬅同樣擁有「段鼻」！而剛分娩的千嬅下巴尖尖，樣子精神，她接受電話訪問時表示在醫院每兩小時餵一次奶：「出院後，我第一樣學識就係泵奶，等陪月可以半夜餵囝囝，我先真真正正瞓咗幾個鐘！」她解釋出院當日因傷口痛，故未能跟傳媒見面。

提到被指要請多位傭人照顧囝囝？曾做護士的千嬅解釋：「只係請咗一個陪月，因為想親力親為照顧囝囝，同埋我都算有根底，大家唔使太擔心！」她謂因剖腹分娩，故傷口未康復，飲食要清淡，更大爆丁子高化身「試毒」銀針：「佢乜都要試，好似飲湯，佢一啖就飲咗三分一碗，Torres呢樣最似爸爸，所以飲奶完全唔使擔心！（追多個？）吓？等我適應吓先啦！我依家先開始適應做媽媽呢個角色，呢啲慢慢再諗！」據知，千嬅暫不安排親友探BB，至BB十二朝後才作安排，而BB房中更設家居網絡電視，方便他們廿四小時隨時察看愛子的情況。

嚴選BB用品廣告

據知，不少BB用品廣告以高價利誘千嬅，酬勞達800萬元！她正嚴選BB用品廣告；而一直有不少收身公司找千嬅拍廣告，但她的宗旨是喜歡透過運動及飲食等自然方法收身，況且目前忙於湊B，未有任何決定。其助手透露會因應千嬅坐月情況而定復工日子，但暑假將推出新歌加精選唱片，她亦感謝廣告商支持。此外，玄學家余中哲解釋：「段鼻要有肉包，配合眼神清係有財富，謝霆鋒都係呢種鼻！」