徐淑敏無悔奉子成婚：依家乜嘢年代

環保的結合，促成徐淑敏（Suki）閃嫁黃浩（Kenny）。Suki三年前為何放棄剛起步的事業，選擇做人老婆生兒育女？好簡單，個肚畀人泵大咗，不嫁不行了！當大家以為Suki嫁得不好，她就要完美演繹何謂嫁得好，奉子成婚未必冇收成！

入行三年後，其實開始對呢個圈厭倦，覺得冇晒自己生活，好似拍劇咁日夜顛倒，真係應付唔嚟，一直都係做自己唔鍾意做嘅事，但我又唔可以拒絕公司，個人愈來愈迷失！三年一個小回顧，喺娛樂圈三年就等於普通人做咗十年工作，一直都想改變現狀，要點改變呢？真係唔知，可能嫁出去係唯一辦法。

三年前有半年時間都係單身，因為自己一直都有拍拖，真係好唔習慣，要喪學嘢同約朋友出街去填滿自己、豐富自己嘅時間。咁啱認識到Kenny，冇耐就追我，我覺得試吓又無妨，咁我哋就一齊喇！

「箍得佢太緊會窒息」

我知好多人都覺得點解我要閃婚？我就會問佢點解唔得？拍拖兩個幾月，當知道自己有咗BB，Kenny就向我求婚，佢話一直都好想搵一個適合嘅女仔同佢共度一生，係一個Family Man嘅人。奈何之前遇上嘅女仔都唔定性，冇一個適合佢，因為緣分到，感覺到喺對嘅時間遇到對嘅人，我就一口應承。其實就算冇BB，如果Kenny向我求婚，我一樣會答應，Why Not？我一向鍾意年紀大過我嘅男人，至少都要5年，Kenny大我12歲，閱歷豐富，聰明到不得了又有經濟基礎，心地好到不得了，最緊要係錫我，真係冇理由唔嫁畀佢。

有人話Kenny花心，咁又點？最緊要係佢唔好搞搞震！講真，見到靚女我都會望吓，如果我箍得佢太緊就一定會窒息，正常社交係絕對冇問題，我睇得好開。喺老公面前唔係扮蠢，而係佢真係比我聰明好多，有時佢講一大輪長篇大論，真係聽極都聽唔明。喺佢心目中，我係比較稚嫩，係一個好乖嘅老婆。

同Kenny結合一切都係緣分，有冇小朋友結局都係一樣，我哋唔係有一個好溫暖嘅家咩？就算未婚就有小朋友又點？依家係乜嘢年代呀？記得當時我同公司講話要嫁畀Kenny，樂小姐（樂易玲）就話要同佢傾吓電話，了解佢係一個點樣嘅人，得到嘅Feedback都好正面，樂小姐話Kenny嫁得過，畀到我好大信心。

「多謝舊愛令我成長」

我以前係好鍾意拍拖嘅人，到依家都仲有人問我點解唔嫁畀黃生（前男友黃重生），要澄清唔係當時我唔肯生小朋友而分手，而係因為我未夠定，當時我喺事業上仍想搏殺，如果同佢結婚會有衝突，家人亦極之反對我同佢一齊，所以剩番一個辦法，就係分手！好慶幸我拍過4次拖，4次都遇到好男人，毫無疑問黃生係好人，但我覺得Kenny更適合我。我冇後悔同任何人拍拖，因為絲絲點點嘅記憶令我不斷成長，真係好多謝佢哋！（明日待續）

Profile

姓名：徐淑敏（Suki）

三圍：33.5、22.5、33

選美榮譽：2006年香港小姐競選「旅遊大使獎」

參與劇集：《最美麗的第七天》、《野蠻奶奶大戰戈師奶》、《巾幗梟雄》 等

口述：徐淑敏　筆錄：專案組