(3)楊斯雅喊足九條街

《2012香港小姐競選》20位候選佳麗前晚以「困獸鬥」形式踢走4名佳麗，但被叮的都是一度被睇好的佳麗，難怪(3)楊斯雅跟(21)曾建怡被Foul後心有不甘，楊斯雅更由東涌哭到出九龍！

二十位入圍港姐候選佳麗前晚到機場禁區拍攝，並即場進行第二輪淘汰賽，踢走4名佳麗。結果(3)楊斯雅、(21)曾建怡及兩名海外佳麗(23)王潔沁及(26)梁靜怡齊齊執包袱。今年港姐以真人騷形式進行，淘汰過程相當殘酷，15位入圍佳麗得悉晉級後，餘下5名佳麗被安排到房中「困獸鬥」，拆信宣布結果，5個只能活1個。

前晚淘汰賽完結後，佳麗離開東涌，出局的楊斯雅雖戴上黑超，但明顯哭得鼻紅紅，相當淒涼。問到可感失望？她說：「隨緣啦！輸贏冇所謂，各花入各眼啫！（淘汰制殘酷？）唔會，都賺咗一個星期嘅訓練。」她由入圍的(17)張名雅陪伴下乘港鐵離開，在車廂依然哭個不停。

曾建怡狀甚不忿，眼紅欲哭，問到可知Foul人準則？她說：「評判自然有佢哋嘅準則，自己盡咗力，尋晚瞓得三個鐘。（賽制殘酷？）唔會，只係淘汰形式轉咗真人騷咁做，好彩得娛樂台同網上播放，少啲人知都好！」另外，在其Facebook發現她與張敬軒等明星的合照，當中更稱落選香港先生李偉健是「阿哥」！而她昨日在微博上載一張喊相，似乎仍對落選之事耿耿於懷。

落選即試做主播

其實部分入圍佳麗質素認真麻麻，例如(8)張鈞美跟似足「人生教練Winne」的(22)尤蔭蔭，難怪楊斯雅和曾建怡感不忿。另外兩位出局的海外佳麗王潔沁及梁靜怡表現平靜，但有點失望，亦覺得淘汰制夠刺激。另外，無綫節目《東張西望》昨晚播出落選佳麗為擔任見習主播進行測試的片段。