關楚耀薛凱琪鬱The Hell

「抑鬱」這個病，其實就像一場感冒，有些人久久未愈，有些人想通了便自然好。歌手薛凱琪（Fiona）和關楚耀（Kelvin），在人生跑道上面對不同壓力，他們感激有過這場重感冒，令自己能夠越過更高的山嶺！

挾着「譚詠麟契仔」之名闖樂壇的Kelvin，入行初期順風順水，擸盡頒獎禮的新人獎，風頭一時無兩，毫無壓力可言！不過2009年，他由天堂直墮深淵，與舊愛在日本涉嫌藏毒被捕，震驚娛樂圈，令不少疼錫他的人大失所望，星途險些一鋪清袋，幸而他痛定思痛，在港舉行記者會後「閉關」反思，一年後「復出」，備受公司及歌迷支持，加上自己爭取機會，幸運之神終又重臨。

涉毒墮入谷底

雖然事發已逾三年，Kelvin仍感難過，但他明白「關關難過關關過」：「當時有幾個月唔敢出街，係人生黑暗期，休息後再出番嚟，覺得好大壓力，好在意外界眼光，但我又唔可以只係抖，因為抖太耐會失去好多機會。（試過壓力爆煲？甚至患情緒病？）咁又冇，嗰年去咗好多學校分享個人經歷，班學生反而令我開竅，變咗我嘅『心理醫生』。」

Kelvin又說：「出道時壓力冇咁大，冇諗過背負住邊個個名加入樂壇。但發生件事（涉藏毒）再出番嚟後，壓力確係大咗。其實一個人成功，係需要壓力嘅，咁先會對工作上心，當然之前令人失望同跌眼鏡，但呢一年我爭番啖氣，證明我係有努力！」雖然近期工作繁忙，家庭樂減少，但他仍堅持每天與家人傾電話，他說：「依家要腳踏實地，雖然工作忙，少咗返屋企食飯，但多工作佢哋都鬆一口氣。」

努力+幸運=重生

他「復出」後人氣慢慢回升，問到是否自覺幸運？他說：「係好幸福同幸運，好多人支持同幫自己，就算有時做得不足，都會有人提點我。」至於有否被引誘再吸毒？他堅定地說：「冇！當年睇到邊啲真朋友，邊啲係豬朋狗友。（怕唔怕舊事重提？）都冇計，惟有做好本分。」

問到減壓良方，他說：「我好鍾意睇籃球賽事，每晚收工返屋企，第一時間就係開電腦，重睇籃球賽事，嗰時會抽離工作。仲有希望每個星期六，都同朋友打番場友誼波！」如果將來有機會，會否介意飾演「毒販」角色？他說：「睇吓劇情係咪需要，自己唔介意角色，都算係挑戰。」

後記：背後女人

經一事、長一智，Kelvin由出道時的年輕小伙子，至近年轉型熟男，除了自身努力和爭取機會外，其女朋友亦應記一功，他說：「佢好支持我，會煮嘢食畀我，之前我燥底，佢就煲啲蔗水畀我飲，好細心！」有這個背後的女人默默支持，壓力？No Way啦﹗

記得Fiona在某個音樂會上，唱起她的歌《給十年後的我》時邊唱邊流淚，「快樂嗎？你情願變得聰明而不衝動嗎……」這首歌大概正是她的心底話，這位對人生力求完美的女孩子，於一年多前因為對每件事都要求太高，以致情緒崩潰，患上可怕的抑鬱症。

愈來愈多藝人患抑鬱症，大概是因為他們都有藝術家的思緒，而這場抑鬱「重感冒」，令Fiona幾乎要尋死，每晚服安眠藥才能入睡。當時她不敢把病情告訴別人，亦不肯上街和見朋友，甚至一度與母親分居。她感謝兩位女性朋友一直撐住她，時常監察其病況。至於緋聞男友方大同，Fiona直認是第一時間告知的人：「我同大同係好好朋友，所以第一個話畀佢聽，但因為個病經歷好長時間，佢又好忙，我哋半年時間冇聯絡，唔想煩到佢，祖名就喺我好番晒先知道。」

劇痛開拓心靈

雖然「感冒」過程相當痛苦和漫長，但讓Fiona心智更加成熟：「我以前對工作、金錢、朋友、屋企同事業，好似一直企喺山中間咁好短視，依家覺得近啲山頂，喺更高嘅視野望個世界。我明白到只要唔好將問題放到咁大，無論有幾多人傷害你都唔再驚！」

回復狀態的她今年大計多多，主力準備即將舉行的首個紅館演唱會。在很多人心目中，Fiona十分「青春」，然而她已步入「鑽石級」盛女行列，幸而她對年齡數字從來看得開：「我後生同有男朋友嘅時候，未必開心過依家，所以有男友或後生都唔代表會開心，最緊要係揀啱人！以前唔係亂揀，但以為自己揀得啱，其實唔係最適合自己。」

Single一樣快活

寧缺勿濫的Fiona安於繼續Single And Available：「未有一個男人令我覺得安全，想同佢結婚。唔係話一拍拖就要結婚，但起碼要搵個我肯嫁嘅人，先至會拍拖。好多人覺得拍拖可以離離合合，但我覺得拍拖已經係一個承諾！」

後記：貓狗為伴

Fiona經歷抑鬱症後，變得更加堅強，但單身女子難免會寂寞吧？她說：「其實基本上唔會，因為我每日都忙到連朋友都冇時間見，唯一寂寞可能係凌晨，有時想搵個人同自己傾電話都冇，大部分Friend都有另一半，我都唔好意思阻住人，所以養咗三隻貓一隻狗囉！」