何紫綸閨房Duck住晒

自嘲外形似鴨仔的模特兒何紫綸，一喊便扁嘴，兼擁有大屁股，故被舊愛取笑她與鴨仔似樣！這份莫名的親切感令她愛上鴨仔造型的產品，家中上至擺設，下至座椅，都鴨蹤處處，誓要無時無刻「與鴨同在」！

今年何紫綸（Ann）加入新模特兒公司，對工作滿腹大計，但依舊童心未泯，對鴨仔產品愛不釋手，她說：「朋友都知我鍾意鴨仔，生日開Party時，會叫佢哋唔好送其他禮物，每人送一隻鴨仔就得，結果最誇張嗰次竟然一次過收到四十幾隻，多到我已經捐咗一袋去做善事。」她表示舊居擺滿鴨仔擺設，但現時的寓所面積有限，很多鴨仔都被迫用袋存放起來，她無奈地說：「今年做咗Ana R.師妹，希望可以努力工作賺錢，第時搬間屋大啲，可以擺晒佢哋出嚟！」

問到何時開始迷上鴨仔產品？Ann說：「其實好大個先開始鍾意，係突發性。大概20歲嗰年，當時男朋友覺得我Pat Pat大，加上一喊就扁嘴，所以叫我做『大Pat鴨』，唔好睇我咁瘦，我Pat Pat好大o架！哈哈！」Ann透露愛鴨初期，香港還未有專賣店，故很難搜索鴨仔產品：「嗰時冇咁容易買到，好多喺外國買返嚟，朋友亦送咗好多畀我，最特別係收過暖水袋，屋企仲會掛鴨仔燈。」

帶埋遊埠泡泡浴

面對眼前一大群鴨仔，傻氣的Ann憶述：「試過帶咗啲鴨仔去酒店浸泡泡浴，又會去泰國泳池游水，仲逼家姐幫我哋影相，所以我同佢哋有好多特別回憶！」

鴨仔本身是鮮黃色，但Ann收藏的產品不但外形可愛，而且五顏六色，她最喜歡迷彩圖案的膠鴨仔，還興奮地說：「我鍾意迷彩Print，自己買嗰幾隻迷彩鴨，大約二百至三百蚊，但所有鴨仔收藏嘅總價值，已經計唔到。」