Eason怒斥黃牛黨搶錢
陳奕迅（Eason）將於8月在亞洲博覽會舉行三場演唱會，內部訂票已爆滿，昨日本報接獲讀者投訴，指前日已有南亞裔男子在亞博門外霸頭位，並聲稱受「Boss」之命來排隊買飛，若老闆「落Order」可以叫50人來排隊。記者親到亞博門外了解，發現有名南亞裔男子排隊，問可知誰是陳奕迅？他竟答：「A Little Bit！（知少少）」他透露每日收600港元排隊，還反問記者是否想買門票？
Eason昨日在重慶開騷，他呼籲歌迷不要買「黃牛飛」，更不滿有人公然話Call人插隊：「嚇一大跳！有冇搞錯，如果真係Call 50人嚟好唔公平，Fans一定要打999報警，最好排隊嘅人打晒手指模，每人憑指模限買兩張飛。」Eason謂貴價門票只售680港元，但排隊黨一日竟收600港元，他憤怒說：「搶錢！咁佢諗住炒幾多錢？Fans千祈唔好買炒飛，我寧願啲貴飛位吉晒，都唔好益排隊黨。」
Eason呼籲粉絲不要購買「黃牛飛」。（資料圖片）