期待Superman 惹火Ana R.狂迷纏身

性格熱情的混血名模Ana R.人紅是非多，有時攬攬錫錫都會被人誤會有新歡，她明白新聞是工作的一部分，但最怕有人藉機抽水大做文章，面對兩年來的騷擾電話及求婚短訊，千奇百趣，她都一笑置之。

向來吸引無數小蜜蜂纏身的Ana，享受被追求當然是樂透的事，但往往會引起不少誤會，最百思不得其解的是有人以電話騷擾她兩年：「有個女人成日打電話嚟公司誣衊我當街錫佢個朋友，但同事追問番個日期，嗰日我根本唔喺香港，佢之後又借唔同原因打嚟，但次次都唔係真，打去電話公司追查電話號碼，都Check唔到來源！」縱使遭人騷擾，Ana都以不想把事情鬧大為由，沒有報警求助，但卻遭對方步步進逼，她說：「咁佢都係打電話嚟啫，又冇咩實質行動真係傷害我，由得佢啦！」

笑對騷擾

本以為電話騷擾已經是極限，怎料高處未算高，她不時收到傾慕者的短訊，每星期收兩三次，仲叫嫁畀佢！Ana笑說：「佢話想同我結婚，有時又話睇到我啲新聞，開頭仲以為係識嘅，點知Send多兩句先覺得唔對路，即刻唔理佢，但發覺每次都係唔同人Send嚟！」身經百戰的Ana已看淡這些騷擾，她深怕有人抽水做新聞，故多次放過對方，只要沒有身體接觸就當有驚無險！

細佬護體

Ana早在十二歲開始已是風頭躉，吸引不少狂蜂浪蝶，她說：「瞓瞓吓以為有鬼坐喺我個窗前，原來有個男仔半夜爬水渠坐喺度，拍住隻窗大叫我個名，後尾先知原來係隔籬街嘅鄰居暗戀我，嚇到我淨係識喊，靠細佬捉住佢打同報警！」細佬在Ana心中佔非常重要的位置，獲細佬多次英雄救美，Ana每次提起都會微笑：「佢係我嘅Superman！試過喺學校畀男仔打，全靠細佬幫我出頭，唯一一次畀男仔打到喊！」

Ana在世界各地工作，曾在東京遇到露體狂，遠赴巴黎更被「襲擊」：「最恐怖係我十五歲時喺巴黎畀人襲擊，有個人跟蹤咗我一段路，點知等我見完工後，喺門口用硬物扑我個頭！我即刻用手上個Portfolio狂打佢，由下巴向上摑，再兜頭向下拍，打到佢瞓喺地，等佢唔好以為我哋女仔好好蝦！」她笑言相簿都可用作防狼器：「爸爸係軍人，細細個已經教我要小心陌生人！」

Ana自言玩捉迷藏都被欺負：「試過玩捉迷藏，個男仔竟然放狗追我，搞到我喊到仆親，喊住返去搵媽咪。」她說：「細個時細佬成日幫我，到我去咗其他地方做模特兒，佢仲好關心我，知我有事都會收埋，所以成日打畀我睇吓有冇人蝦我！」即使受盡外間嚴厲的評論、狂迷瘋狂的行徑，在Ana心中最重要是有個Superman去保護自己！

後記：大無畏

縱使Ana R.經常遇到狂迷追蹤，但性格硬朗的她卻說：「我見得多風浪，依家冇咩人可以嚇得到我，啲露體狂見到你愈驚佢愈開心，千祈唔好畀佢得逞，反而要嚇番佢轉頭！」自喻身經百戰的她經常遇上數之不盡的狂迷，卻頻呼好彩，每次都大步檻過，與衰神擦身而過。