旺角派號外apm睇決賽 娜姐19式等你App

周秀娜近排頻頻跑步練氣，仲密密咪書同下載歐國盃App，原來係為咗迎接四年一度嘅足球界盛事歐洲國家盃。《東方日報》及《太陽報》喺歐國盃期間推出「歐國波Something」App，娜姐都有參與，開波前仲會落旺角派號外，又會同球迷一齊喺觀塘apm睇決賽，唔怪得要惡補足球知識啦！

雖然球星Friend里奧費迪南落選英格蘭大軍，但冇影響周秀娜對歐國盃嘅興致，佢將聯同師妹Jeana、Hidy、Annie G.、Hailey C.、LemonBeez成員Waye同CoCo、Rika等亮相「歐國波Something」App，呢個喺iPhone下載嘅App內容豐富，娜姐會同大家講波兼傳授「女神19式」，教你點樣喺歐國盃期間同男仔好好相處！個App最勁係有即時賽果同即時新聞，想知歐國盃發生緊乜事，撳個掣就知道晒，真係要即刻Download。

除咗App可以見到娜姐同一班師妹，嚟緊六月八日下晝仲有機會同娜姐親身接觸，佢會同Annie G.、Hailey C.踩落旺角大派歐國盃號外《娜．波號外》，號外有齊分組賽賽程、16強簡介等，一份在手再加埋個App，做唔到波經名家，都起碼做到睇波專家。

娜姐講到明就算幾忙都好，一定預留七月二日凌晨歐國盃終極決戰當晚空檔，同班師妹一齊睇波，球迷都有機會同佢哋排排坐觀賞激戰o架！只要上「歐國波Something」App參加歐國妹Polling投票活動，揀選心目中最喜愛歐國妹，就有機會參加喺觀塘apm舉行嘅「我和女神終極決賽約會」，同娜姐邊睇波邊玩遊戲，投票愈多，機會愈大！

大日子

今日起：iPhone有得下載「歐國波Something」App；「歐國妹Polling」展開，參加者有機會得到「我和女神終極決賽約會」入場券。

8/6：周秀娜落旺角派歐國盃特集《娜．波號外》。

2/7凌晨：「我和女神終極決賽約會」於觀塘apm震撼登場，娜姐及一班師妹坐鎮睇決賽。