糖妹「拔Gym」 45度角脫脂

樂壇組合糖兄妹成員糖妹（黃山怡），近日為音樂會及舞台劇忙個不停，為了保持弗爆身形，頻頻健身消脂，不過饞嘴的她表示太愛吃東西，只好邊食邊Keep Fit！

身形的骰的宅男女神糖妹最近密密到健身中心Keep Fit，為排山倒海的工作做準備。日前糖妹獲型男教練Zero教路，主攻帶氧運動，練習時十分吃力，尤其是半蹲動作更令她叫苦連天。其後她拿着波擺出「45度角」的姿勢狂練側腹肌及舉啞鈴，誓要踢走腰間「Call機肉」及練到手瓜起(月展)。

雖然練習過程辛苦，但糖妹仍咬緊牙關堅持：「舊年完全冇時間做，最多都係喺屋企拉筋，唔係好夠，成個人啲肌肉硬晒，今年決定抽多啲時間做Gym。」

男友笑有啲肥

問到哪方面最弱？糖妹說：「腰同腳都好弱，測過脂肪比例，原來我啲Baby Fat達到邊緣位置，唔可以再咁落去！於是的起心肝喪做運動，好彩朋友都覺得我瘦咗。（食嘢？）我就冇乜減到食量，因為太鍾意食嘢，惟有一路食一路Keep Fit！」問到男友Dominic有否讚瘦了？糖妹說：「佢冇覺得我瘦咗，仲話我有啲肥，不過我自己覺得瘦咗。」