柏豪絕迹公仔箱：婆婆驚我冇收入

我有一個阿哥同細佬，但婆婆特別錫我，可能因為係佢湊大。細個時，婆婆為咗救我一命，搞到自己差啲冇命。嗰陣仲好細個，婆婆攞住盆熱水想同我沖涼，點知我周圍走，行到佢腳邊，佢又睇唔到我，成盆熱水就淋落嚟，婆婆即刻好機警咁踢開咗我，但啲熱水就淋晒落佢隻腳度，之後唔識得善後，隻腳發炎細菌感染，要入深切治療部。

依家婆婆隻腳仲有疤痕，有時都仲會攞出嚟講，話嗰陣時好慘！

難忘外婆接濟

早幾年我跟陳光榮學音樂，兩年冇收入，婆婆每個月會入兩千蚊落我戶口做零用，真係好感動！到依家佢仲會擔心，佢好留意娛樂新聞，知道TVB同四大關係唔好，有歌手冇得亮相，當睇電視見唔到我，婆婆就驚我冇嘢做、冇收入，又會問我係咪唔夠錢結婚？真係好傻！

婆婆今年84歲，身體愈嚟愈差，試過腦中風，又有痛風症，佢依家同舅父一齊住，我哋堅持唔畀佢住老人院。依家一有時間就會去探佢，同佢傾吓偈。我知佢好想睇到我成家立室，依家最重要係搵多啲錢畀屋企人享福，以前遇到低潮，家人無限量畀支持，但我成日亂發脾氣鬧媽咪，真係好慚愧！所以一定要做出好成績，唔會令佢哋失望！（全文完）

後記：差一點走紅

周柏豪擁有不俗外形，樣貌、身高、打扮也屬潮人一族，卻總是差一點點運氣走紅；「天時、地利、人和」，從來都是娛樂圈的致勝之道。周父說得對，不可以讓自己鬆懈起來，因為不知道機會何時來？加油吧，玻璃杯達人！