歌神張學友受Eason一拜

歌神張學友146場巡唱前晚圓滿結束，過去一年入場觀眾逾200萬創造健力士世界紀錄，吹神陳奕迅（Eason）睇騷後激讚，自稱Die Hard Fans的他在慶功宴上跪拜學友，佩服得五體投地。

學友前晚舉行第10場在亞洲博覽館演出的《張學友1/2世紀演唱會》，全場爆滿，Eason、蔡一智、導演劉偉強、狄波拉和老公捧場，學友演唱了《餓狼傳說》等Hit歌。臨近12時，他不捨地說：「多謝大家過去1年半陪住我，我過咗一個非常開心難忘嘅50歲。」還真情流露地說：「我係非常含蓄嘅男人，其實我好愛大家！就算6、70歲，只要你哋喺度，我會將自己最好交出嚟！」並唱至零時十分完騷。

學友在慶功宴上獲健力士世界紀錄認證官吳曉紅宣布，巡唱於前年12月30日至去年12月29日，觀眾總數達2,048,553人，締造了12個月內巡唱觀眾人數最多的健力士世界紀錄，學友說：「好想一世唱落去，自己冇要破乜紀錄。」

「送嘴」示愛

而Eason亦有出席慶功宴，並以歌迷自居跪拜學友，兩人又攬又貼面，兩張嘴幾乎撞在一起，學友即笑說：「叫劉導演開部《秋光乍洩》。」Eason大讚學友演出冇得頂：「佢保持146場都唔病，值得學習，畀佢爆晒分，佢係一個好大集體回憶，尤其我呢啲死Fans，佢真係神嚟！」