Elanne李靜 「滴滴仔」決高下

藝人江若琳與奧運銀牌得主、「乒乓孖寶」之一的李靜昨日於上水廣場出席活動時，以「滴滴仔」一較高下！自言男仔頭的江若琳自細愛做運動，希望有更多機會拍動作片！

江若琳（Elanne）昨日到上水廣場出席《世界體壇珍藏－歷屆火炬展》活動，同場展出由「中國奧運收藏第一人」周儉雄提供的歷屆奧運聖火火炬，由新鴻基地產代理租務部高級推廣經理劉文豪先生致辭揭開序幕。Elanne與李靜以「滴滴仔」一較高下，最後由李靜勝出，他們更於球拍上簽名給對方留念。

Elanne表示早前於電影《高舉．愛》中飾演舉重選手，故拍攝前受過專業訓練：「嗰陣每日都要練好多個鐘，由最初舉晾衫竹，到最後可以舉起30kg嘅啞鈴，明白到做運動員真係好辛苦！」原來她曾學體操：「4歲至7歲有玩單槓，所以柔軟度好高，做一字馬、拱橋都冇問題！不過後來有一齊學嘅小朋友受傷，媽咪知道後都擔心，所以就叫我改跳中國舞！」

吊威吔勁興奮

Elanne自爆兒時相當活躍，紮紮跳冇時停：「我去親媽咪啲朋友屋企，成日喺人哋張梳化度跳嚟跳去，搞到梳化好污糟，媽咪仲曾經以為我有過度活躍症！」自言「男仔頭」的她希望有更多機會拍動作片：「曾經返內地拍古裝片，要吊威吔，覺得好興奮！不過因為唔識用力，試過整傷對手，要請人食嘢道歉！（學防狼術？）學過空手道，我諗啲色狼唔敢埋身！」