碩之唔知新歡有米：唔通查家宅！

趙碩之早前被指狠撇窮侍應，在夜店與「金龜」新歡鐘錶富商攬啜。談及與舊愛分手，她強調與第三者無關，主要原因是舊愛受不了壓力患上情緒病，最終因感情轉淡而分手。

我同前男友分咗手幾個月，但唔係因為第三者！拍拖4年來，我哋都畀自己好大壓力，尤其係我前男友，佢好想拉近我哋之間喺事業上嘅差距，佢想對得住「趙碩之男友」呢5個字，結果到咗後期，佢因為太大壓力而患上情緒病。嗰段時間，佢完全唔想同我溝通，當佢知道自己有事後，一切已經太遲，大家嘅感情已經淡咗，當然好可惜，我都為分手喊咗好多次！

拍拖遊馬騮山

雖然拍咗拖4年，但我從來冇對外承認有男友，因為我想保護呢段關係。我覺得藝人拍拖，無論對方係圈內或圈外人，最初一定唔想公開，就係怕萬一有問題要分手會成為話題。要維持4年地下情話難唔難、話易唔易，我哋主要留喺屋企，若果想出去行吓就去旅行，或者去大圍踩單車、去行馬騮山，呢啲都係幾好嘅戶外活動，好似去番童年咁開心同簡單。點解夠膽出去拍拖？因為嗰啲地方好安全，絕對唔會遇到傳媒！

羨慕公開拖手

有陣時，我都好羨慕人哋可以喺銅鑼灣拖住手Sweet Sweet，或者逼港鐵時可以有男友挺身保護……但如果依家有男仔約我去街，我又可能唔知去邊度先算拍拖，因為我根本冇「正常拍拖」呢個觀念。雖然好可惜，但人總唔可能咩都擁有，我明白喺呢一行，有啲犧牲係必要嘅。　講到「新歡」，我都冇諗過發展會咁神速，同佢識咗好多年，突然走得好近係因為大家都鍾意潛水，所以好好傾。最初識佢時，我根本唔知佢做咩行業、係唔係富商。做朋友啫！唔通查家宅咩！我只可以話同佢仍然係發展中，希望大家可以畀多啲空間我哋。（明日待續）