22歲結婚生仔 汪詩詩：激死媽咪

汪詩詩與父母及妹妹汪圓圓關係要好，經常結伴出席活動。詩詩透露小時候父母對她們管教嚴，自稱反叛的她，笑言閃電結婚及未婚懷孕已足以激死父母。

由細到大，我同家人嘅感情都好好，父母對我同圓圓管教好嚴，媽媽覺得我性格太直，鍾意識朋友又貪玩，如果唔好好管束，怕我會結交壞朋友，受佢哋影響而走上歪路，所以屋企嘅門禁好嚴，經常都唔畀我出夜街，就算我同朋友睇戲，媽媽都要我做完功課、家務、練完鋼琴先可以出去，記得有次我已經買咗演唱會飛，但因為未做好功課，所以唔畀我出去睇，張飛係我用幾百蚊美金買o架！但媽咪對呢方面好堅持原則，完全唔肯讓步。

諗過離家出走

父母要求我將所識嘅朋友帶畀佢哋過目，啲人覺得見家長好嚴重，但對我嚟講好平常，幾乎所有朋友都見過我屋企人，我有啲朋友，媽咪見完都會建議我少啲同佢哋見面。

我算係好難教又反叛嘅小朋友，可能因為父母管得太嚴，令我更加有反抗嘅心，試過好想學壞，不過，到真係做嘅時候又唔敢，我有諗過離家出走，但只係諗囉！我當然試過好多次激嬲媽咪，我22歲就結婚生仔，已經激死佢啦！因為媽咪都好早結婚生仔，所以佢覺得女仔應該要做咗自己想做嘅嘢先結婚，因為婚後就冇晒私人時間，老實講，我都唔想將來囡囡好似我咁早結婚，不過，緣分係冇得好講。

感謝圓圓支持

媽媽嘅教育令我獲益良多，我好佩服佢肯放手畀我選擇，只要係我嘅選擇，佢就會支持，呢一點我到依家都做唔到，我總係忍唔住幫小朋友作主，揀一個我以為最好嘅選擇，事後發覺原來並唔係。

好感謝父母畀咗我一個溫暖而充滿愛嘅家，一直無條件支持我，仲有圓圓，無論我發生咩事，只要一個電話，佢就即刻喺我身邊，我嘅重要時刻總會有佢。

（明日待續）

口述：汪詩詩　筆錄：名人組