「超齡」黃智雯失聯絡誤捲醉姦案

尖沙咀「明星竇」錄音室發生女星被姦疑案，受害者被指是一名23歲女藝人，驚震整個娛樂圈！多位年輕女星包括樂瞳及龔嘉欣等，紛紛「報平安」澄清並非受害者，連年屆29歲的無綫小花黃智雯也一度因失聯絡而惹誤會，令她莫名其妙！

昨日爆出一名23歲女藝人，報稱在尖沙咀一間錄音室被強姦，消息傳遍整個娛樂圈，基於保護受害女子，受害者身份未被公開，只知她曾參選港姐及歌影視三棲發展等，隨即引來全城熱估誰是受害者！

多位廿多歲的年輕女星即時成為「熱估」對象，連年屆29歲的「關二嫂」黃智雯（Mandy）亦被拉落水，一度傳出是受害者！忙於踩兩組拍攝《巴不得媽媽》及《法網狙擊》的她，昨日接受電話訪問時否認是受害女星，她說：「嗰晚我同羅仲謙喺公司拍《巴》劇到半夜先收工，之後就返屋企。我唔識嗰個人，亦冇去過所講嘅錄音室，都唔明點解會傳我，幾愕然！」她透露連公司亦聯絡她了解，亦有不少朋友來電，但她因開工而未有接聽，令朋友擔心不已。

嫩模陳苑晴籲小心

而現年25歲的樂瞳亦收到不少慰問電話，她說：「我係有條件符合，但當然唔係我！我冇選過美，又簽咗唱片公司，仲錄咗幾首歌添！我冇上過嗰間錄音室，同埋一定唔會半夜走去密室同人傾偈！」而年僅20歲的模特兒陳苑晴亦一度被指是受害者，她說：「我唔係TVB人，只係有個家姐，但無論件事係咪真，雙方都有責任，咁夜去一個異性朋友度，真係要好小心！」

王淑玲唔單獨劈酒

而模特兒出身的王淑玲則強調未夠23歲：「我12月先23歲，今日有好多人打畀我問有冇事，都唔係我，亦冇上過錄音室。平時飲酒大班朋友可以，單獨就有危險性，幾熟都好，自己安全最緊要。」同樣未夠23歲的龔嘉欣亦狂接朋友電話，而其男友鄧健泓亦有留意相關新聞，希望事件盡快告一段落；而現年22歲的蔣家旻及選美出身的胡中慧，亦否認是受害者。