汪詩詩生仔：子丹陪得一晚

汪詩詩與老公甄子丹育有一子一女，由於子丹大部分時間不在港，她要母兼父職，即使當年分娩，子丹亦只能陪她一個晚上，但詩詩毫無怨言，反而將子女的生活點滴拍下讓子丹重溫，藉以鼓勵他努力工作。

同子丹有對仔女，大女八歲，細仔四歲，近幾年子丹好忙，片約不斷，無可避免犧牲咗同小朋友相處時間。結婚頭兩年，我哋分隔異地，我同囡囡住喺加拿大，子丹喺香港，莫講話見面，連傾電話都好難遷就。記得有次佢飛去加拿大陪我過除夕，點知倒數未開始，佢已經攰到瞓咗。後來覺得咁樣對大家同小朋友都唔好，於是搬返香港。

拍Video記錄生活

細仔出世嗰年，係子丹最忙嘅一年，成年夾埋只有一個月喺香港。我原本打算催生，等子丹去外地前可以見到囝囝出世，好在囝囝早產咗，子丹當日只係陪咗我一晚，第二朝就要走。其實子丹見到BB出世，我已經好滿足。

子丹係一個好丈夫、好爸爸，每逢節日都想盡辦法返香港陪我哋，但我叫佢唔好。因為去過探班，知道一部戲涉及百幾個幕前幕後，如果停拍一日，有百幾人冇工開，影響好大，我唔可以咁自私。咁多年，習慣咗母兼父職，好在身邊有家人同（妹妹）圓圓，爸爸年紀唔大，可以代替子丹成為家中嘅男性角色。囡囡成日想子丹喺身邊，尤其有表演嗰陣，想爸爸睇到，我會拍Video同影相留畀子丹睇，就算小朋友洗牙，我都會影，所以屋企有超過二萬張相。小朋友嘅相同短片，成為咗子丹工作最大嘅鼓勵。

工作方面，子丹好有主見，其他嘢，佢全權畀我話事。佢喺小朋友面前係慈父，負責同小朋友玩，我就扮演嚴母，管教好嚴。記得囡囡三歲嗰年，我哋第一次喺囡囡面前鬧交，當時我要囡囡坐定食飯，佢唔肯，走去嗲爸爸，子丹話由得佢，我堅持，子丹就抱住個女話我唔應該咁惡。事後，我同子丹講我哋要方向一致，佢都同意，之後就再冇同類事發生，佢好信任我嘅管教方法，連囡囡都話媽咪係波士，爸爸好聽媽咪話。

女兒阻人掂爸爸

雖然同子丹都係公眾人物，但唔想小朋友覺得自己同其他人唔同，亦好怕佢哋變「港童」，我會訓練佢哋照顧自己日常生活。佢哋仲細，唔明白爸爸係明星，都係最近先睇過子丹嘅戲。以前有Fans搵子丹影相，囡囡會攬住子丹隻腳，唔想畀人掂爸爸。（明日待續）

口述：汪詩詩

筆錄：名人組