麥貝夷Mood到掃眼鏡鍾一憲髮飾當煲呔

默契十足的情侶檔歌手鍾一憲（Jason）及麥貝夷（Karene）同樣愛儲飾物，常穿恤衫的Jason喜歡變身「煲呔J」，顏色愈Sharp愈愛；原本是四眼妹的Karene則愛儲眼鏡，並會以不同款式配襯當日心情。

情侶檔歌手Jason與Karene互數是貪靚一族，不時四出搜購配飾襯衫，他們分別最愛煲呔及眼鏡，收藏數量更是「唔講得笑」！Jason擁有近百個煲呔，顏色及款式超多，令人花多眼亂！問到何以喜歡儲煲呔？他笑言源於其「豐滿身材」：「以前細個係肥仔，冇咩自信，所以想靠衣着搶眼，而且有時食肥咗扣唔到頸喉鈕，都可以打煲呔遮一遮！」

戴黑超遮眼腫

Jason坦言打煲呔已成為其標誌，不少觀眾都憑此認得他。而早前他生日時收到一名忠實Fans的「七彩煲呔禮盒」，令他大感窩心：「佢親手整咗十幾個煲呔畀我，有齊唔同顏色，方便襯衫。」在眾多收藏中，有不少都是DIY作品，Jason表示因他認識煲呔店老闆，對方不時為他「打造」得意款式，例如改良髮飾及波襪煲呔，認真有創意！

而Karene亦收藏40多副眼鏡，包括黑超、平光鏡及冇鏡片的眼鏡。原來小學時代她已是四眼妹，雖然長大後因工作需要改戴隱形眼鏡，但仍「超不離身」，袋中隨時有一、兩副眼鏡。問到揀眼鏡的準則，Karene說：「我塊面比較細，所以形狀要配合到我面形，如果係限量版就更值得儲。」自認是購物狂的她，每逢發生一件大事便買一樣東西紀念，她拿起黑白框的太陽眼鏡說：「幾個月前屋企有白事，喊到眼腫腫，就買呢款黑白色嘅遮住雙眼。」而另一款藍框黃臂的則是與開心事有關，她說：「舊年暑假出EP，買呢副嚟獎勵自己，顏色夠繽紛。」此時Jason表示有同款眼鏡，並即戴上，但原來兩人並非一齊買，莫非真是心有靈犀？

互相置裝　心有靈犀

Jason與Karene分別儲下大批煲呔及眼鏡，可見對衣着十分講究，兩人亦對對方的Taste瞭如指掌。這天兩人不約而同穿上粉色系列，更表示會為對方買下合適的飾物及衣服，認真窩心！Karene說：「行街見到啱對方嘅都會買，我哋都清楚大家鍾意咩，唔會買錯。」但他們坦承拍檔初期不時為襯衫有拗撬，要相處一段時間才開始有默契。