50歲華仔做老竇收埋6磅小龍女

現年50歲的劉德華昨日終於做老竇！華仔的46歲老婆朱麗倩前晚入院，昨日誕下6磅多「小龍女」，惟華仔貫徹避談作風，不肯向外公布喜訊，搞到粉絲也嚷着逼華仔報喜！

未有向外公布預產期的朱麗倩，前晚秘密入住跑馬地養和醫院，於昨日誕下「小龍女」，雖然保密工夫做到十足，但仍然走漏風聲。醫院有近30名傳媒在守候。至於華仔居住的加多利山的大宅，亦有傳媒等候，惟未見華仔及其雙親蹤影！

粉絲逼報喜

據知，華仔千金重逾6磅，朱麗倩母女平安！雖然產女消息已傳遍娛樂圈，但華仔始終未肯對外公布做老竇喜訊，連官網也未見其留言；反而華仔粉絲已在官網留言祝福：「期待明（昨）天好消息。」、「我們家的公主終於誕生了，華仔啊？你啥時候親自報喜呢？」、「老大！我們要聽喜訊！老大！恭喜老大當爹！」連粉絲也「逼」偶像報喜！

至於華仔的「小龍女」是否已出世？華仔公司發言人說：「冇任何消息！（如果BB出世華仔會唔會公布？）（華仔）冇講過，都係等通知。（你喺醫院？）喺公司。」

嘟姐冇爆料

對於46歲的朱麗倩來說，高齡產女畢竟年紀較大，據家庭醫生關嘉美表示，相比其他年輕孕婦，朱麗倩的復原能力較差，更要注意產後護理，她說：「年紀大嘅婦女生完BB要多啲休息，通常高齡產婦生完BB會比較攰，始終佢已經46歲，餵人奶都會好攰！不過又唔好太補，因為佢中年好易血壓高、糖尿病，食物以清淡為主。」

另外，昨日有傳是鄭裕玲（嘟姐）在電台節目中爆料，指華仔於前日榮升老竇！記者就此事致電鄭裕玲，她透過助手回應：「我冇喺節目度講呢樣嘢，你哋可以上網聽番。」